RAPÒRT MORAL FELCO 2018
O cal plan dire, 2018, foguèt per nautres una annada complicada. Esperàvem, après l’AG de 2017, qualquas avançadas del costat del ministèri qu’aviam capitat de i aver un rendètz-vos amb lo Sénher Matthieu Lahaye, encargat de las lengas regionalas. Lo rescontre, que se debanèt lo 11 de genièr foguèt cortés mas sens avançada concreta. Pasmens, tot del long de l’annada, faguèrem remontar al ministèri nòstre lagui cap a la refòrma del licèu e del bachelierat, quitament amb la FLAREP qu’una delegacion ont èrem representats foguèt recebuda al ministèri al mes de julhet.
Las intervencions de nòstras associacions tant coma las de l’OPLO, amb lo qual nos rescontrèrem tanben al mes de febrièr per evocar los problèmas tocant a l’ensenhament de l’occitan e las refòrmas en cors, aguèron pas gaire de resson al ministèri que, d’evidéncia, a decidit de pas faire cas de las nòstras revendicacions. Fa un brave moment qu’avèm pas agut en fàcia de nosautres una administracion tant mespresosa.
E se los parlementaris faguèron seguir nòstras demandas a travèrs lors questions escritas, lo ministèri contunhèt de respondre per son argumentari costumièr e jamais mes a jorn.
Tota la paradòxa de nòstre ensenhament es que, al moment ont sembla – la darrèra enquista sus la lenga realizada pel conselh despartamental dels Pirenèus-Atlantics o mòstra encara – d’èsser acceptat e quitament demandat per bona part de la populacion, l’Educacion nacionala met pauc a cha pauc en plaça, après una primièra refòrma del licèu e la refòrma del collègi, una entrepresa de destruccion de las opcions jutjadas costosas. La crenta, solide, e l’enquista que nòstres collègas del CA Matthieu Peitavin, Bruno Duranton e Olivièr Pasquetti o mòstra plan, es de véser tota la filièra d’ensenhament de l’occitan cabussar dins las annadas venentas. Los darrèrs eveniments d’aquesta debuta d’annada 2019, lo fosc entretengut per l’administracion, son biais de dire una causa e son contrari, empachan pel moment d’envisatjar l’avenidor d’un biais seren. Tot aquò ven destimborlar encara mai de collègas ja aclapats per lors condicions de trabalh e entreten un sentiment general de precaritat.
E es pas la dubertura simbolica – e tant tardièra qu’empachèt la mesa en plaça de formacions oficialas – d’una agregacion intèrna que va contrabalançar los degalhs anonciats.
Sul plan de la vida intèrna de la FELCO, podèm pas que nos felicitar un còp mai de la reactivitat del mond quand son consultats suls divèrses dorsièrs. Es aquela reactivitat e lo fait que cadun a son nivèl, amb sas coneissenças sus tal o tal grad d’ensenhament o tal o tal subjècte particular, que nos permetèt de fargar de dorsièrs solides a presentar al ministèri e d’aver una vision d’ensemble de nòstre ensenhament, de sas capitadas (n’i a, urosament !), de sos problèmas e de çò que se dessenha per l’an que ven a travèrs la refòrma del licèu e del bachelierat.
Tant val dire que per aqueste an avèm encara d’òbra. Nos caldrà primièr res daissar passar sus la question d’aquesta refòrma e contunhar de nos batre d’un biais acarnassit, amb l’ajuda dels partenaris nòstres que son la FLAREP, l’APLV, las organizacions sindicalas, l’OPLO, lo Congrès e d’unes parlementaris que fan regularament remontar nòstras revendicacions. Nos caldrà tanben èsser particularament atentius a las signatura de las convencions entre los rectorats e l’OPLO per las regions concernidas e a la tenguda dels conselhs academics e als projèctes de desvolopament de l’ensenhament de l’occitan dins las autras academias.
Aquesta annada 2019, lo CREO Tolosa festejarà sos cinquanta ans (per aquò nos prepausa de ne profieitar per téner a Tolosa l’AG de la FELCO l’an que ven e partetjar un moment festiu). Cinquanta ans, es pas res : pendent aqueles decènnis nòstre ensenhament coneguèt de moments dificils coma los que vivèm ara, mas tanben d’avançadas que nos cal pas negligir e que se faguèron sovent pas d’un biais espectaclós mas un pas après l’autre. O cal pas doblidar e cal contunhar d’i creire e de seguir la dralha : es çò que farem encara aquesta annada amb l’ajuda de totes.l 2018
