L’Universitat Tolosa-Joan Jaurés ven de crear un site internet batejat AutorÒc 16-18 (https://autoroc.org) que permet d’accedir a las numerizacions dels tèxtes d’autors occitans en lenga occitana o sus la matèria occitana del periòde modèrne (sègles XVI, XVII e XVIII). Fòrça bibliotècas numerizèron de publicacions occitanas, en Occitània (Bibliotèca d’estudi e del patrimoni de Tolosa, Bibliotècas universitàrias de Tolosa…), en França (Bibliotèca nacionala de França) o en Euròpa (Bibliotèca nacionala d’Àustria, Bibliotèca de l’Estat de Bavièra…) e se’n tròban fòrça tanben sus Google Books. La recerca d’aquelas numerizacions necessita sovent fòrça temps e paciéncia e lo site AutorÒc 16-18 permet d’accedir dirèctament a la ressorsa electronica. En mai d’aquò, de referéncias bibliograficas son donadas per conéisser l’istòria dels tèxtes e tanben de referéncias per conéisser la biografia de l’autor.
Lo site AutorÒc 16-18 es destinat a èstre actualizat en foncion de las numerizacions e de las publicacions que seràn realizadas al fial del temps. Tota suggestion d’apondon o correccion d’error es planvenguda.
Lo site AutorÒc es una realizacion del Pòl d’Ensenhament, Recerca e Documentacion en Occitan e Catalan (PERDOCA), creat en 2021 per assegurar la coordinacion e la visibilitat de las activitats de recerca e d’ensenhament de l’Universitat Tolosa-Joan Jaurés ligadas a la matièra occitana o catalana. Recampa mai de 30 cercaires, mai de 30 projèctes de recerca, 4 masters, 3 licéncias e 4 bibliotècas (https://perdoca.univ-tlse2.fr).
