L’associacion Terrairòl, edita dempuèi 2017 una agenda escolara occitana que permet de perlongar un pauc lo trabalh quotidian de la classa. Coma dins tota agenda, i a las paginas « linhadas » per i escriure (lo trabalh de far, las causas de desmembrar pas, los afars de portar…).
Pels periòds de vacanças, i a de paginas « ludicas », amb de recèptas, de bricolatges, de poesias, de tèxtes…etc… Los jorns feriats son « explicats » e d’aicí d’ailà se pòt trapar d’autras informacions…
Lo principi es de publicar sonque de contenguts liures de dreits o amb l’autorizacion expressa del·de las autor·as e/o dels ostals d’edicion, dins diferentas variantas d’occitan, mas tanben dins d’autras lengas (ligat al programa Familhas de Lengas, menat dins d’unas escòlas…).
Cada annada, la tampa es signada d’un artista conegut·da e reconegut·da e ligat·da d’un biais o d’un autre a la lenga occitana. De còps, l’artista es mai que ligat·da : un vertadièr engatjament ! Aital, agèrem l’astre de poder mostrar als enfants d’òbras de Ben, Claude Viallat, Hervé Di Rosa, Isabelle Marsala, Joan-Carles Codèrc. Per 2024-2025, mercé al sosten e l’ajuda del Musèu eponim de Rodés, èra una reproduccion de la Serigrafia n°1 de Pierre Soulages.
Per 2025-2026 es Alice, l’explorartista, que nos fa lo polit present d’un convit al sòmi e al viatge…
Lo nombre de tiratges es limitat, sus comanda. Ça que la, per 2024-2025 n’avèm tirat (e vendut e/o distribuit) 1300 exemplars !
D’une·as collègas ne crompan o fan crompar per una classa tota, d’autre·as daissan la causida als escolan·as. Dins d’unas escòlas, l’agenda es ofèrta en fin d’annada als CM2 que partisson pel collègi.
Prepausam de modèls diferents per cada zòna escolara, per fin de respectar las datas de vacanças dins la mesa en pagina. Los noms dels jorns e dels meses, e los tablèus de conjugasons son diferents d’un modèl a l’autre (gascon, lemosin o lengadocian per la zòna A, provençau per la zòna B, lengadocian per la zòna C). A despart d’aquò, totes los contenguts son identics e multivarietals : un tèxt arribat en gascon, serà publicat en gascon dins los diferents modèls. Una poesia en provençau, serà publicada en provençau per tot lo monde, una recèpta en lengadocian o serà d’una zòna a l’autra, tant coma un bricolatge en lemosin…
Prepausam tanben una version « sens vacanças », amb 52 setmanas, de presentacion un pauc diferenta mas amb de contenguts meteisses, per respondre a la demanda d’unes adultes.
Se pòt veire aquí :
modèl « escolar » : https://www.calameo.com/read/00669174760f7905c1434?authid=Yr95CeoIDoba
modèl « sens vacanças » : https://www.calameo.com/read/006691747138cd51fc8ff?authid=APZwrPXEOfTy
