La FELCO foguèt recebuda dijòus, lo 11 de genièr, per Matthieu Lahaye, conselhièr del ministre de l’Educacion nacionala encargat de las lengas regionalas. Lo dorsièr preparatòri, en linha sus aqueste ligam, li èra estat remés lo 21 de decembre.
Pendent aquesta audiéncia d’una ora, la delegacion, constituida de Maria-Joana Verny, co-secretària, e de Yan Lespoux, president, comencèt per tornar rapidament suls blocatges existents : non respèctes dels tèxtes per d’unas instàncias de l’EN, abséncia de declinasons academicas de la convencion Estat/OPLO dins las academias de Tolosa e Montpelhièr, fauta de signatura de las convencions adicionalas.
Insistiguèt tanben un còp de mai sus las inegalitats de tractament de la question de l’ensenhament de l’occitan segon los endreits e rampèlet las declaracions de campanha de M. Macron en responsa al questionari #2017oc ont disiá la necessitat d’una lei per las LR e l’importància de manténer una dinamica de desvolopament de l’ensenhament de l’occitan.
Puèi s’engatgèt la discussion alentorn dels pòstes al concors.
Per l’agregacion, la FELCO exprimiguèt sa decepcion après l’anóncia de la dubertura d’un sol pòste al concors e diguèt cossí aquesta anóncia foguèt aculhida coma un camoflet. Tornèt sul fait que los candidats estent quasi totes de certificats ja afectats sus de pòstes, la dubertura de mai de pòstes a l’agregacion auriá un còst marginal.
M. Lahaye respondèt qu’ausissiá plan aquel argument, mas que la DGRH aviá del dorsièr una vision diferenta, purament tecnica, e que podiá pas anticipar per una agregacion extèrna lo nombre de certificats que se presentarián al concors e capitarián. Apondèt qu’es a partir d’aquel vejaire « tecnic » e dins l’encastre d’una politica « d’emplec zero » e d’estabilitat dels efectius d’ensenhaires que foguèron calculats los pòstes al concors.
La FELCO abordèt aquí la question de la demesida dels pòstes al CAPES e respondèt a M. Lahaye que los arguments del MEN, en particular la letra de M. Pacohil (cap de cabinet del Ministre) de decembre passat – en linha sus aquel ligam – , i semblavan desconectats de la realitat. La FELCO avancèt lo nombre de desparts a la retirada previsibles (d’après las informacions recebudas de Tolosa e Montpelhièr) sens comptar los que i auriá dins las academias per lasqualas aviá pas las informacions, la part dels ensenhaments de valéncia que son donc pas consacrats a l’ensenhament de l’occitan (9 equivalents temps plens, per exemple, sus 59 certificats per l’Acadèmia de Tolosa) e l’agravament regular del deficit de pòstes que met en dangièr de filièras entièras.
Lo sénher Lahaye admetèt que las chifras de la FELCO mostravan una realitat diferenta del vejaire de la DGRH e que los anava estudiar e transmetre.
Totjorn a prepaus de la letra del Ministèri del 21 de decembre, la FELCO apondèt que, contràriament a çò jos-entendut, se cap de candidat èra pas estat classat en lista complementària après las espròvas del CAPES de 2017, èra pas perque la jurada aviá refusat de dubrir aquesta lista, mas perqué lo MEN aviá pas acceptat, malgrat la demanda de la jurada, de ne dubrir una.
La FELCO demandèt puèi que l’agregacion de las Lengas de França, opcion occitan, siá duberta cada annada e amb un nombre de pòstes en rapòrt amb lo nombre d’ensenhaires d’occitan e l’espandida de l’airal concernit.
M. Lahaye sap actualament pas çò qu’es previst, mas a pres nòta de la demanda e dels arguments de la FELCO. Un dels principals arguments del ministèri per pas s’engatjar cap als pòstes – argument représ per çò que tòca a la refòrma del licèu – es que lo fait que las lengas regionalas sián consideradas coma las autras matièras mostrariá que son respectadas e « integradas a l’ecosistèma de l’Educacion nacionala » [sic], çò que seriá una forma de reconeissença.
La FELCO exprimiguèt puèi son inquietud sus l’avenidor de l’occitan al licèu dins l’encastre de la refòrma del licèu e del bachelierat e demandèt d’informacions sus çò previst pel ministèri per nòstre ensenhament.
M. Lahaye respondèt que los ensenhaires d’occitan èran pas los sols que se pausèsson de questions mas que, coma lo MEN èra encara dins una fasa de concertacion, cap de decision èra presa pel moment.
Pasmens, la FELCO demandèt a M. Lahaye de portar la votz de l’occitan e de las LR en general per tal que siagan pas doblidadas dins la refòrma. Butèt tanben un còp de mai sus las inegalitats e la fragilizacion de l’ensenhament de l’occitan creadas per la diferéncia de coeficient en opcion entre LR e LCA e per l’impossibilitat pels liceans que s’engatjan en filièra tecnologica de perseguir un ensenhament d’occitan.
Enfin, la delegacion remetèt a M. Lahaye lo dorsièr de 67 projèctes pedagogics recampats dins las darrièras setmanas alprèp dels collègas. Bravament espantat, M. Lahaye mercegèt la FELCO e diguèt tot lo ben que pensava d’aqueles projèctes. Foguèt l’escasença per la FELCO de li rampelar qu’aqueles projèctes èran possibles perque los ensenhaires d’occitan son de mond engatjats e dinamics, mas que lo ministèri los ajudariá pas gaire a avançar se creava pas de melhoras condicions d’ensenhament, çò que passa en particular per de recrutaments que son necites.
Lo bilanç de tirar d’aquel acamp es d’abòrd que, per rapòrt a las audiéncias precendentas dins l’encastre de la FLAREP (cf. mai que mai en linha, lo RC de l’audiéncia del 21 de decembre : http://www.felco-creo.org/1032-2/), la possibilitat de desvolopar mai aquelas questions amb un nombre redusit d’interlocutors, l’escota recebuda foguèt plan melhora e lo dialòg mens tibat.
Pasmens, i a pas gaire d’engatjaments de la part del ministèri. Se M. Lahaye diguèt que contunhariá d’espepissar los dorsièrs de la FELCO E de faire remontar nòstres arguments e demandas, evitèt tota presa de posicion clara e tota promessa de melhoracion, en particular sus la question dels pòstes als concorses.
