01-02-23 – Compte rendut del CA e de l’AG de la FELCO – 21-01-23

Publié le 1 février 2023 par Marie-Jeanne Verny

Acamp del CA de 11 oras a miègjorn e mièja

Olivier PASQUETTI dubrís l’amassada en explicar la causida de far l’AG en presencial sens prepausar de distancial. Bruno DURANTON demanda se seriá pas possible de far l’AG mai tard dins l’annada per facilitar los desplaçaments del monde. Virginie LAGO demanda s’es pas possible d’anonciar la data mai d’ora.

1. Comunicacion entre la FELCO e las seccions academicas.

  • Olivier PASQUETTI pausa la question de la comunicacion entre la FELCO e las seccions academicas.
  • Benoît BOLANO (Representant 1er gra del CREO Lengadòc) parla de son sentit de veire arribar al CA un fum de mèls sens i poder respondre. Olivièr ditz que la FELCO es a crear una adreiça mèl oficiala que permetrà benlèu de limitar e de triar los mèls.
  • Jérémie MARÇAIS demanda se seriá pas possible de crear una mena de forum sus DISCORD.
  • Maria Joana Verny (d’ara en dabans « MJV ») fa remarcar qu’es fòrça complicada la question de la comunicacion intèrna, que i soscam dempuèi d’annadas e qu’es vertat qu’avèm pas trobada encara de solucion satisfasenta per totes. Caldriá crear una commission tecnica que pòsca testar la causa abans de la generalizar. Anam ensajar tanben de crear una letra automatica en ligam amb los articles novèls del site.
  • Benoît BOLANO e Jérémie MARÇAIS se prepausan per trabalhar ensemble per fargar un forum sus DISCORD. L’amassada generala lor balha son acòrd. Nos perpausaràn quicòm lèu.
  • Laura BONNET (CREO Auvernha) : Avèm un tot pichon CREO. Es puslèu al dintre del CREO que la comunicacion es complicada. Es vertat que l’AG al mes de genièr es pas ideal per far davalar lo monde de Cantal.
  • Olivier PASQUETTI : La comunicacion cap a la FELCO se fa primièrament via los representants academics. Es a eles de repercutar las informacions qu’arriban del burèu, de consultar los aderents per las questions pausadas. Las listas de difusion dels uns e dels autres son pas « oficialas » e an pas vocacion d’o èsser, ni de circular, per de rasons legalas de proteccion de las donadas.

2. La plaça del primièr gra al dintre de la FELCO.

  • Benoît BOLLANO Fa remarcar tanben que l’essencial de las problematicas de la FELCO son centradas sul segond gra.
  • Olivier PASQUETTI : la FELCO a plenament consciéncia d’aquò mas es vertat que dempuèi 4 ans, tre la refòrma Blanquer, las questions e los problèmas ligats au 2nd gra an pres un granda plaça. Benlèu se podriá far un acamp especific al primièr gra
  • Fabienne ALBERT: sovent los collègas del primièr gra s’investisson mai dins los CREOs despartamentals.Los presents fan pasmens remarcar a Fabienne que l’acamp en visio qu’organizèt al nom de la comission 1er gra es estada una brava capitada e qu’aviá permés de recampar un grand nombre de collègas de totas las acadèmias.
  • Mathieu POITEVIN / Sarah LAURENT (per l’AELOC) : en Provença es al contrari lo primièr gra que dinamiza l’AELOC.
  • MJV : un rescontre entre los collègas del primièr gra de l’ensemble de las lengas regionalas es de preveire dins l’encastre del collòqui FLAREP.

3. Collòqui de la FLAREP de Niça en octobre de 2023.

  • Olivier PASQUETTI : Lo collòqui FLAREP es l’escasença de tornar dinamizar lo nòstre ensenhament, de far rescontrar los collègas, las associacions (parents e ensenhaires) de las autras lengas. Es un moment que nos cal absoludament capitar. Pel moment nos sèm ocupats amb lo clavaire de las demandas de subvencions e de la reservacion del luòc. Un ligam es estat mandat ja per demandar al monde de se marcar per sa contribucion. Cal endralhar un comitatde pilotatge. Lo monde se pòdon senhalar sus aqueste ligam per prepausar causas e ajuda : https://docs.google.com/document/d/1wHo2WdhtbWBhWIL38x1WL0mrUwE4jVqzrkWjr1zGWN8/edit?usp=sharing.
  • MJV : prepausa que lo collòqui si’a centrat sus la question de l’ofèrta d’ensenhament prevista per l’article 7 de la lei Molac amb un tèma coma « Les langues régionales à l’école publique pour la réussite de tous ».
  • Olivier PASQUETTI : Fa remarcar que i aurà en Avinhon a las meteissas datas lo Forum d’Oc, çò qu’es evidentament problematic.

AMASSADA GENERALA

(duberta a 13 oras e mièja)

  • Presents : Fabienne Albert, Joan Barcelo, Benaset Bolano, Sébastien Bournat, Robin Chouleur, Bruno Duranton Virginie Lago, Mélanie Laupies, Sarah Laurent, Jérémie Marçais, Felip Martel, Frédéric Martron, Gilbert Mercadier, Olivier Pasquetti, Matieu Poitavin, M. Joana Verny

e mai Sylvain Blachon (representant l’OPLO)

  • Desensusats : Emmanuel Isopet, Cristòl Menassol, Nadège Péhau, Marie Boivert, Léo Humbert, Sonia Labat, Olivier Caponi, Denis Galvier, Sylvain Chabaud, Marie-Anne Chateaureynaud, Estelle Lame, Lionel Cayrol.

Un mot del director deu CIRDOC, Cyril Gispert

Se ditz plan urós  aculhir l’AG de la FELCO e de veire los ensenhaires trabalhar aital e aquí. Al CIRDOC li ten al còr de trabalhar tanben per perpausar daisinas pedagogigas, coma la « maleta » que se n’entreva Jeanne-Marie Vazelles. Un mot al prepaus del centenari Robert Lafont : d’eveniments : lecturas de tèxtes, creacion teatrala, conferéncias : http://www.felco-creo.org/wp-content/uploads/2023/01/2301-05-Audience-FELCO-Minist%C3%A8re-OK.pdf. Una mòstra fisica es estada fargada e una mòstra virtuala es a s’elaborar en collaboracion  amb Paul Valéry. Après serà lo centenari Manciet

1 – Rapòrts e eleccions (CA e burèu)

Vòte dels rapòrts

Olivier Pasquetti precisa tanben que serà pas fach de punt academic, aquest an, perqué aqueste foguèt fach a l’escasença del dorsièr montat per l’audiéncia al ministèri (6 de genièr) : http://www.felco-creo.org/wp-content/uploads/2023/01/2301-05-Audience-FELCO-Minist%C3%A8re-OK.pdf

Adoptat a l’unanimitat que balha quitus al clavaire.

Eleccion del CA e del burèu dels representants de la FELCO dins las diversas instàncias que n’es membre

Eleccion del CA

  1. Fabienne Albert – 1er gra – Montpelhièr
  2. Maria Boivert – 2nd gra – Tolosa
  3. Benaset Bolano – 1er gra – Montpelhièr
  4. Silvan Chabaud – Universitat – Montpelhièr
  5. Marie-Anne Chateaureynaud – INSPE – Bordèu
  6. Joan-Frances Courouau- Universitat- Tolosa
  7. Bruno Duranton – 2nd gra – Tolosa
  8. Denis Galvier – 1er Gra – Montpelhièr
  9. Tomàs Hirondèla – 2nd gra – Bordè
  10. Felip Martel – Universitat – Montpelhièr
  11. Cristòl Menassol – 1er gra – Tolosa
  12. Gilbert Mercadier – 2nd gra – Tolosa
  13. Olivier Pasquetti –2nd gra Niça
  14. Matieu Poitavin – 2nd gra – Ais
  15. Maria-Joana Verny – Universitat – Montpelhièr

→ Lo CA es votat a l’unanimitat

  • Los representents academics

AELOC (2 delegadas)

  1. Maria-Francesa LAMOTTE (1er gra)
  2. Sarah LAURENT (2nd gra)

APLR (2 delegats)

  1. Jeremia MARCAIS (1er gra)
  2. Frederic MARTRON (2nd gra)

CREO Aquitània (2 delegats)

  1. Clamenç MASSEILLOU – 1er gra
  2. Nadège PEHAU – 2nd gra

CREO Auvernha (1 delegada)

  1. Laura Bonnet – 1er gra

CREO Daufinat-Vivarés (1 delegat)

  1. Gerard-Joan Barcelo – 2nd gra

CREO Lengadòc (2 delegats)

  1. Robin Chouleur – 1er gra

CREO de la Talvèra

  1. Patrici Roques – 2nd gra

CREO Tolosa (2 delegats)

  1. Virginia Lago (2nd gra)
  2. Jean-Baptiste Courcelle (1er gra)

Eleccion deu burèu

Se presentan :

  • Pasquetti : president
  • Vici president : Barceló
  • Clavaires : Duranton / Laure Bonnet
  • Secretariat : Lago / Verny

→ Burèu votat a l’unanimitat

2- Punt sus los diferents mandats al dintre de las autras associacions – Eleccion dels representants mandatats

NB el secretariat FELCO : sul site, per la transparéncia e l’informacion de totes, ensajam de metre en linha lo maximum d’informacions sus nòstre trabalh al dintre de las autras associacions. Gròs trabalh de publicacion, de segur, mas que permet de jutjar de la democracia de foncionament : http://www.felco-creo.org/category/nostras-accions/amb_las_autras_associacions/.

Lo Congrès

https://locongres.org/fr

  • Gilbèrt Mercadièr explica los otisses recentament creats (« votz » e « revirada »). Senhala que son dos otisses plan utils, mas que « revirada »), l’otís de traduccion, deu èsser acompanhat per los professors per evitar de contrasens e marridas interpretacions. Un webinaire organizat en collaboracion amb l’OPLO lo 1er de febrièr serà escadença de familiarizar los ensenhaires amb los otisses creats.
  • Maria Joana torna sus l’evolucion de l’estatut del Congrès. Aqueste èra estat concebut a la partença unencament coma un luòc de trabalh tecnic, un otís de regulacion de la lenga, de mesa a disposicion d’otisses d’ajuda per los utilizators, a començar per los ensenhaires. Aquesta mission del congrès es complida d’un biais excellent e los otisses fargats, e que contunhan de se fargar, son indispensables. Per aquò, lo Congrès ramosa de linguistas e a tanben un collègi d’usatgièrs eissits de las diversas associacions cotizairas. Dins un periòd d’atacas grèvas contra l’ensenhament de l’occitan, una AG decidiguèt de la possibilitat, per lo Congrès, d’aver tanben d’accions reivindicativas. Quina que siá la legitimitat d’aqueste cambiament, es un cambiament  fondamental e foguèt decidit sens consulacion prealabla del burèu de la FELCO abans vòte en AG. La FELCO a pas jamai agut de desacòrd de fons amb las accions « politicas » del congrès (intervencions al moment de las eleccions, intervencions pròche dels elegits o del Ministèri). Pasmens, per MJ, lo burèu a d’èsser consultat quand lo congrès pren una posicion o fai una declaracion al nom de las associacions sòcias. Tot lo mond es estacat a la democracia al dintre de la FELCO e la FELCO es estacada a la democracia al dintre de las estructuras que n’es sòcia. MJ demanda donc a las personas que representaràn la FELCO al dintre del congrès d’èsser vigilantas sus aquò e demanda que lo burèu siá abans tota presa de decision politica del Congrès.

Bruno Duranton e Gérard-Jean Barcelo se prepausan per aquel mandat e lo president Pasquetti los merceja.

Pour que vivent nos langues

https://www.pourqueviventnoslangues.org/

Aqueste collectiu foguèt creat a l’auton 2019 en reaccion a la refòrma dels licèus qu’escanava las lengas regionalas. La FELCO n’es membre dempuèi la debuta e a seguit fidèlament totas las accions democraticament decididas. E mai es estada presenta a totes los acamps (lo mai sovent en visio).

Lo gròs moment foguèt lo questionari mandat per las accions presidencialas e legislativas. Per las legislativas, l’òbra èra colossala que i aviá de milherats de candidats de consultar, e mai en excluissent la drecha extrèma.

Al nivèl occitan, OCBI se carguèt de bona part de l’oest (Aquitània e Lemosin). La FELCO se carguèt de tot lo demai (un gròs vintenat de departaments), solament ajudada per l’IEO per Aude, Calandreta Pirenèus Atlantics, d’unes CREOs despartementals (12, 81), l’APLR per l’acadèmia de NIça. Al nivèl de PQVNL, Maria Joana assegurèt lo seguit de  l’accion amb lo psdt de Diwan.

Nos a permés de far un recensament dels deputats entre los qu’avián votat la lèi Molac (o pas) e crosat ambe las responsas a las legislativas. D’aquel temps, PQVNL s’amassava cada 2 setmanas.

Se faguèt tanben una jornada de trabalh parisenc en setembre, mai que mai sus los otisses de comunicacion. Gilbèrt, que representa lo Congrès a PQVNL e MJ son d’acòrdi per dire que, de còps las questions tecnicas prenon lo pas sus las questions politicas.

De notar que se PQVNL fonciona dins la democracia (cap de comunicat es pas mandat, cap d’accion es pas lançada sens l’acòrd dels membres), arribam a un punt ont metèm un pauc la pedala doça puèi que cada region a sos problèmas especifics e sas accions de menar. D’ara endabans limitam las reunions a 1 per mes. Cada lenga a chepics, a còps es malaisit de téner sus la longor mas  i a una democracia, amassadas regularas.

Representanta : Maria-Joana Verny

APLV

https://aplv-languesmodernes.org/ Es una de las mai vièlhas associacions d’ensenhaires qu’a mai de 120 ans d’atge e una expertisa segura, amb 2 dralhas principalas :

  • sosten de la diversitat de las lengas estrangièras e regionalas ensenhadas
  • batèsta per la qualitat pedagogica de l’ensenhament de las lengas, amb publicacion d’una revista Les langues modernes

Avèm de nòvas regularas de las accions de l’APLV per nòstre delegat Patrici Roques e per la letra als aderents que recebèm. Cf. http://www.felco-creo.org/2022-un-an-de-trabalh-amb-laplv/ e http://www.felco-creo.org/15-01-23-compte-rendut-dactivitat-de-patrici-roques-al-dintre-de-laplv-per-2022/

Seriá una bona causa que los collègas donèsson lor adesion a l’APLV qu’escapa pas coma las autras associacions o los sindicats a una baissa de las adesions. En mai d’aquò Patrici Roques, que representa la FELCO al dintre del CA de l’APLV, seriá plan content de veire « montar » de mond novèls per tal de lo poder remplaçar. Cal rampelar que per se presentar al CA cal justificar a minima de 3 ans d’adesion.

Es decidit de demandar a Patrici Roques de contunhar encara un pauc e lo mercejam encara de sa preséncia e del ligam de contunh que fa entre la FELCO e l’APLV.

FLAREP

https://www.flarep.com/

I aguèt aquest an doas audiéncias precisar e una pichòta delegacion occitana participèt al collòqui de Rennes que ne trobaretz un compte rendut sul site : http://www.felco-creo.org/6549-2/. De còps es malaisit de poder assistir a las reunions perqué son sovent a d’oras qu’assablen pas tròp lo monde. Pasmens i a mai d’escota al dintre de la FLAREP que l’an passat.

Retorn del rescontre al ministèri : lo ministèri es estat clar, i aurà pas de dotacion ministeriala especifica per las LR’s. Legir un compte rendut detalhat : http://www.felco-creo.org/06-01-23-une-delegation-de-la-flarep-est-recue-au-ministere-dgesco-compte-rendu/.

La FELCO organiza aquest an lo collòqui annadièr de la FLAREP : Niça, 1èra dimenjada de las vacanças de Totsants. Ara nos cal far en sòrta que sia una capitada.

D’unes pausèron la question d’una accion judiciària comuna sus l’article 7 de la lei Molac, integrat dins lo Còde de l’educacion[1]. Maria-Joana explica qu’a l’escasença d’escambis amb de juristas li es estat dich que la non-aplicacion de l’article 7 serà pas de bon atacar estent que l’article dona de perspectivas sens obligacion de resultat. Gilabert senhala que los Bretons se pausan tanben la question au dintre de PQVNL. Mas pòt costar car en terma d’energia amb lo risc de ganhar pas.

Representant a la FLAREP : Olivier Pasquetti

3- Accion elegits – comunicat sus los pòstes al CAPES

Gilabèrt Mercadier insistís sul fach qu’en-delà dels comunicats es sustot fòrça important de manténer una pression constanta e viva suls elegits qu’an votat la lei Molac.

Es important, quand la FELCO manda un corrièr als deputats, de doblar l’accion dins las associacions academicas o despartamentalas, çò que fai sistematicament lo CREO 12.

Se discutís puèi del contengut de la letra als deputats que deu acompanhar lo comunicat suls pòstes al CAPES : metre en evidéncia l’inegalitat entre lengas, tot lo mond n’es consent. Mas se pausa la question, dins un document escrich, de pas « trencar » amb

Comunicat pòstes al CAPES : cossí nos organizam per difusir lo comunicat ? Premsa e responsables associatius : lo secretariat s’encarga d’o enviar mas cal doblar tanben al nivèl local.

Per los contacts premsa, d’adreiças utilas :

https://www.voxpublic.org/spip.php?page=annuaire&cat=medias&type_media=Presse+nationale&pagnum=20

https://www.voxpublic.org/spip.php?page=annuaire&cat=medias&type_media=Presse%20quotidienne%20r%C3%A9gionale

4- Colloqui FLAREP

  • L’idèa de la generalizacion de l’ofèrta d’ensenhament (art. 7 de la lei MOLAC coma tèma central) es lançada e conven als participants.
  • Cal pensar a la creacion d’un comitat d’organizacion entre FELCO e OCBI : costat FELCO, es prepausat que li sián d’ofici los membres dau burèu (Pasquetti, Barcelo, Bonnet, Duranton, Lago, Verny) los responsables de las comissions (Albert, Lago, Pieracci, Chateaureynaud) , Martel, Mercadier puèi serà facha una crida a las bonas volontats per totes aqueles que vòlon ajudar e integrar lo comitat d’organizacion.
  • MJ rampèla los grands principis d’organizacion e de contengut dels collòquis FLAREP
    • Son organizats cada annada dins un espaci linguistic diferent e totjorn la primièra dimenjada de las vacanças de Totsants
    • An una dobla finalitat :
      • politica (faire avançar la question de l’ensenhament public de l’occitan en cò dels elegits, dels sindicats e tanben de l’Educacion nacionala
      • pedagogica : constituisson per los collègas e los parents un luòc de formacion e d’escambis
    • Entremèsclan de talhièrs de trabalh e d’escambis amb de conferéncias donadas per d’especialistas de las questions pedagogicas e militantas.Preveson tanben de moments culturals : visita del luòc d’acuelh, seradas musicalas, teatralas.
    • Dins las causas de faire :
      • Trobar un títol lo mai cort e lo mai fòrt possible e de definir lèu lèu un visual per tal de començar de comunicar
      • Prepausar d’interveneires de convidar amb una comanda precisa. Gilbert a pensat a un collèga de Corsega que poiria explicar cossi se faguèron las avançadas de Corsega. MJV lo contacta.
      • Començar d’elaborar un pre-programa del collòqui
      • Començar de pensar a la programacion culturala.

4- Convencions

Sus l’espaci concernit per l’OPLO (acadèmias de Bordèu, Lemòtges, Montpelhièr e Tolosa)

un projècte de convencion-cadre es a virar d’un biais oficiós sus los grands principis que regiràn aquesta convencion. Serà puèi completada per de declinasons academicas, puèi que la convencion-cadre rampèla los tèxtes mas conten pas cap d’engatjament d’objectius chifrats. L’OPLO farà proposicions e suggestions au ministèri. Proposicion : espiar las prepausicions de l’OPLO e lor far remarcas abans lo 30 de genièr.

L’OPLO exprimiguèt dins una deliberacion sa volontat d’alargar la convencion a las acadèmias que son pas dins sa zòna de referéncia.

Region SUD

Los collègas de l’AELOC e de l’APLR demandan regularament a la Region que se metèsse en plaça una convencion. Deuriá arribar. Mas se sap pas res del contengut.

Auvèrnha – Granòble

Demanda del president Pasquetti als dos CREO concernits si se sentisson d’encontrar la Region per l’interpelar sus la question.

5- Adreça mèl – comunicacion

(cf. Tanben questions divèrsas en seguida)

Virginia va a Montpelhier en febrièr per parametrar l’adreiça e trabalhar sus las aisinas de comunicacion per corrièr electronica, la constitucion dels fichièrs d’adreiças, l’eficacitat de la comunicacion quand visa entre 5000 e 7000 personas e mai qualques centenats (listas collègas, listas elegits, listas premsa). Serà tanben escasença de soscar a la destinacion d’una adreiça « oficiala » :

  • Comunicacion intèrna al dintre del CA
  • Comunicacion semi-extèrna als collègas identificat e volontaris per recebre d’informacions
  • Comunicacion extèrna (elegits, sindicats, ministèri…)

6- Questions juridicas

Sus la circularia que demanda l’imposicion de l’anglès a totes los nivèls. Cal veire si un jurista sap s’es de bon atacar o pas. Verificar si  lo mot « obligatòri » es emplegat.

NB : aqueste compte rendut es estat redigit per V. Lago e MJ Verny, cosecretàrias, e relegit per Olivièr Pasquetti, president. Mercé a Bruno Duranton de sas nòtas.

7- Questions diversas (Complements del president)

NB : las responsas a las questions divèrsas son fachas per lo president Pasquetti. Vaquí per qué passam del lengadocian al nissard (practica de l’interdialectalitat al dintre de la FELCO !)

A-     Adreiça mail de la FELCO

Maria-Joana e Virginia si retrovan en febrièr per temptar de manipulacions necessàrias a la mesa en plaça d’una adreiça oficiala. A pauc a pauc, caurà trovar lo mejan tecnic per faire de mandadís de mai de 5000 destinataris. Remembri que l’AG dau 08/01/2022 a evocat la constrecha tecnica per de mandadís de mai de 3000 destinataris e qu’un an après, degun a trovat la solucion o prepausat una ajuda tecnica que permetriá de solucionar aqueu problèma.

N’aprofiti per remembrar que la comunicacion oficiala tra FELCO e seccions academica es assegurada per lu rapresentants academics qu’an lo poder d’escrieure a la basa de cada acadèmia au nom de la FELCO, e que la FELCO, en lo sieu foncionament, demanda ai rapresentants academics d’assegurar aquela correspondença tra lo CA e li seccions academiqui. Aqueu foncionament empedisse pas que lu membres dau CA son personalament jonhables e disponibles per tota demanda d’un collèga de tota seccion academica e empedisse nimai que cada collèga de bòna volontat utilize lo sieu carnet per difusir e espandir li informacions de la FELCO.

Se un collèga fòra dau CA vòu s’adreiçar a la FELCO en general, lo sieu rapresentant academic es aquí per trasmetre.

B-     Estrategia per rapòrt a las convencions Estat-Region dins li acadèmias cuberti per l’OPLO e dins li regions fòra de l’OPLO ?

La FELCO considera l’OPLO coma instança de dialòg essenciala. Per aquò, i aguèt 6 acamps durant lo 2022 sus lo subjècte dau renovelament de la convencion-cadre.

Li primièri consultacions, sembla que se fan essencialament entre OPLO – que lo Ministèri li es au dedintre via lo rector de Tolosa – rectorats e Ministèri. Li divèrsi associacions academiqui son pas oficialament consultadi e doncas es dificil de sasir la FELCO d’un biais public e transparent.

Tanben, li es aquela volontat comuna de partenariat embé li Regions que son pas sus lo territòri de l’OPLO (cf.mocion votada a l’AG de l’OPLO dau 2022) L’OPLO a demandat au Ministeri de sollicitar li 2 regions que son pas sus lo sieu territòri (ARA e SUD). Au nivèu local, AELOC e APLR an rescontrat la Region SUD. Una convencion veirà lo jorn en lo 2023. Per Auvernhe-Ròse-Aups, la FELCO si ten a la disposicion dei seccions academiqui – CREO Auvernha e dau CREO Daufinat – en mai de la volontat comuna afichada embé l’OPLO, per faire bolegar li causas en aquela region. Li situacions locali impausan cada còu d’adaptar l’estrategia.

C-     Seguit après lo collòqui FLAREP de Rennes – octòbre 2022 – d’accions judiciàrias per faire respectar la lei ?

Li 2 audienças que la FLAREP auguèt ai Ministèris de l’Educacion e de la Cultura an portat d’elements novèus sus li modalitats d’aplicacion de la lei Molac (cf. RC DGESCO-FLAREP http://www.felco-creo.org/06-01-23-une-delegation-de-la-flarep-est-recue-au-ministere-dgesco-compte-rendu/).

Es pas d’actualitat per lo moment a la FLAREP d’entamenar d’accions judiciari.

En tant que rapresentant de la FELCO a la FLAREP, li pòdi suggerir en li setmanas que venon l’eventualitat d’una accion judiciària e lor demandar de n’examinar las possibilitats. Mas remembri que per una accion en justícia, cau èstre balès.

D-     Planh juridic contre la circulària dau 15/12 ?

Cauriá veire se d’elements son atacables. Siau pas au fiéu d’una accion per lo moment. L’APLV a fach un comunicat sus aquela circulària[2] (https://aplv-languesmodernes.org/spip.php?article9693) mas ditz pas que siá juridicament atacabla. Cen que porriam atacar quora lo ministeri ditz qu’es una obligacion pedagogica au meme titre que li maths o lo francés ?

En tant que president de la FELCO, siáu preneire de tota dralha d’argumentari per contestar juridicament aquela circulària. Da segre.

[1] Article 7 : La section 4 du chapitre II du titre Ier du livre III du code de l’éducation est complétée par un article L. 312-11-2 ainsi rédigé : « Art. L. 312-11-2.-Sans préjudice de l’article L. 312-11-1, dans le cadre de conventions entre l’Etat et les régions, la collectivité de Corse, la Collectivité européenne d’Alsace ou les collectivités territoriales régies par l’article 73 de la Constitution, la langue régionale est une matière enseignée dans le cadre de l’horaire normal des écoles maternelles et élémentaires, des collèges et des lycées sur tout ou partie des territoires concernés, dans le but de proposer l’enseignement de la langue régionale à tous les élèves. »

[2] Bulletin Officiel n°47 du 15 décembre, circulaire intitulée « Enseignement de l’anglais et des langues vivantes étrangères tout au long de la scolarité obligatoire ».

Ce contenu a été publié dans Vida intèrna. Vous pouvez le mettre en favoris avec ce permalien.