Presents
- Gautier Lagalaye, director de l’OPLO
- Marie-Jeanne Verny, presidenta del CREO
- Benoit Bolano, vici-president del CREO
- Josette Soliva, clavaira del CREO
- Claire Torreilles, secretària adjunta del CREO
Mercejam Gautier Lagalaye de venir jos la pluèja rescontrar lo burèu del CREO ! L’acamp se fa en cò de la presidenta.
Dins un primièr temps Gautier Lagalaye presenta la dralha que compta de seguir e sos principis d’accion. Lo CREO se felicita del renovelament de l’OPLO en desirar que venga un organisme solid , amb, tant coma es possible, un personal estadís : nos sembla que l’estabilitat es necita per bastir d’accions sul tèrme long qu’es lo de l’educacion. Puèi los membres del burèu fan estat de demandas concrètas vengudas dels collègas.
Presentacion dels principis de GL per la direccion de l’OPLO
– Cambiar de postura politica : se comparar mens als Catalans o als Bascos ont la màger part del territòri es en Espanha e que las lengas i an un estaut de lenga oficiala.
– Consultar las associacions establidas e trabalhar amb elas et amb las collectivitats per que l’OPLO posca conselhar e acompanhar puslèu que d’èsser « mèstre d’obratge ».
Lo director novèl se plaça dins una dinamica de recèrca e de desvolopament de la socializacion de la lenga, en s’apiejant, ont que siá e per tant pauc que siá, sus l’existent, cultural, linguistic, militant…
GL explica tanben sa volontat d’alargament de la zòna d’influéncia de l’OPLO a l’espaci lingüistic occitan a condicion que i a aja una demanda tot en tornar dire que i a un perimètre d’accion prioritari. Li sembla important d’aumentar lo nombre de locutors e de trobar d’otisses per aquò per metre en dialòg los locutors « naturals » (que se sentisson sovent estrangièrs al monde militant) e lo mond militant qu’a pas totjorn una lenga assegurada. Aqueles dos monds, segon GL, son estrangièrs l’un a l’autre.
L’OPLO se vòl concentrar sus 3 tematicas
- observacion de las practicas linguisticas
- transmission
- sociabilizacion
- comunicacion
Organizacion / reorganizacion.
Après lo cambiament de direccion, 5 emplecs sus 8 son vacants e son ofèrts al recrutament. Lo CREO insistís sul besonh d’estabilitat del personal e soveta qu’una part d’aqueste siá efèctivament implantada dins l’acadèmia de Montpelhièr.
Responsas a las questions e demandas dels aderents al CREO
A la question pausada sus la redistribucion de las subvencions, responsa es facha que tot çò « regional » dependrà de las Regions e que tot çò interregional serà del domèni de l’OPLO.
Lo CREO presenta las demandas dels collègas : otisses pedagogics, libres de lectura per totes los nivèls, jòcs per accedir a la lenga, videos, manuals. Lo president de l’OPLO pren nòta e afortís una volontat de crear una comunautat d’actors de l’ensenhament, un malhum internet per los professors d’occitan.
En conclusion
Lo CREO a un vertadièr besonh d’ ajuda a regard de l’aumentacion de l’ofèrta d’ensenhement public de l’occitan, segon çò que prevei l’article 7 de la lei de 2021, ara integrat dins lo Code de l’Education. Per aquò es necite d’afichar una visibilitat especifica de l’ensenhament public. Per defaut d’una MARCA identificabla, coma o avèm dich, l’ensenhament public es tròp sovent desconegut dels mèdias coma dels elegits. L’OPLO pòt se donar per tòca de far l’invencion e la promocion d’aquela MARCA.
Avèm tanben insistit sul besonh de consultacion democratica dels personals al dintre dels conselhs d’escòlas quora es prefigurada la dubertura d’un site bilingue. Lo document de l’OPLO actualament en linha plaça la consultacion dels elegits abans aquela dels personals, çò que crèa de riscas gròsses de conflictes al dinre de la còla dels ensenhaires.
De segur la transmission de l’occitan que contribuís a la reconoissença publica de la lenga pòt pas anar sens una aumentacion programada e seriosa de sa socializacion. Dins l’espaci occitan en general, delà los territòris cobèrts per l’OPLO e en passant per los relais associatius existents de plan considerar e consolidar.
