Temps d’escambis plan cortet (20 minutas). Lo deputat èra preissat que deviá préner un trin a Montpelhièr. Escambis corteses. De documents preparatòris (dorsièr de presentacion de l’ensenhament de l’occitan en Avairon, recapitulatiu dels tèxtes oficials, nòta de sintèsi) èran estats mandats per aprestar lo RDV. Lo deputat assegura n’aver pres coneissença.
– Aprèp una rapida presentacion del CREO 12 e de son estructuracion despartementala, rapèli lo questionari de PQVNL relaiat al moment de las eleccions legislativas e demorat sens responsa. Tòrni presentar PQVNL e sa tòca : dempuèi quora existís, son but de portar al prèp dels parlementaris e institucionals las revendicacions comunas a totas las LVR. A l’interrogacion sus la non-responsa al questionari mandat, sa responsa : « Je ne me voyais pas répondre à des questions sur lesquelles je n’avais pas assez d’informations. Les réponses engagent, j’ai donc préféré temporiser ». Joslinhi lo ròtle central de PQVNL al prèp dels parlementaris al moment de la lei en abrial de 2021. Ne profiti per li rapelar los tèxtes oficials que regentan l’ensenhament de l’occitan e de las lengas regionalas.
– Basculam puèi directament sus la question de l’ensenhament de l’occitan en general e dins Avairon en particulièr. Tòrni far un rapide focus sus la situacion en Avairon. Demanda de precizions de mon interlocutor :
- sus las diferéncias entre ensenhament bilingue e ensenhament immersiu.
- sus la formacion dels ensenhaires d’occitan. Rapèli que l’occitan representa 8 acadèmias e 32 despartaments e que la formacion es assegurada sonque a Tolosa, Montpelhièr e Bordèu. Al passatge mon interlocutor semblava descubrir l’existéncia del CAPES, dels CRPE especific e encara de l’agregacion… Pensava que los ensenhaires d’occitan fasián aquò per completar lor servici de letras, d’istòria-geografia o d’espanhòl.
- Sus l’impact de la refòrma Blanquer : aquí li avançèri las chifras que coneissèm totes, la mesa en concurréncia entre los ensenhaments, la lassièra dels collègas, la fragilizacion de mantunes liçèus, la baissa istorica del nombre de liçeans…
- S’avèm jà agut contactes amb lo novèl ministre : li parli de la nòstra visio amb la FELCO al mes de julhet e de las demandas de RDV que son estadas fachas dempuèi.
– Darrièra partida consacrada a las nòstras demandas :
- li demandi de far remontar al MEN la question de las oras flechadas per l’ensenhament de l’occitan e de demandar que totas las oras d’occitan siagan finançadas sus una envelòpa especifica.
- li demandi de quichar per que se bote en plaça una vertadièra ofèrta generalizada coma previst dins la lei de 2021 e la circulària de decembre 2021.
- li demandi de quichar al prèp del MEN per que s’amande la refòrma Blanquer amb lo retorn d’una vertadièra opcion bonificanta coma preconizat dins lo rapòrt Brunn-Garnier de 2021.
- li parli enfin de la question centrala de la formacion iniciala e de la formacion de contunh (CPD, animators pedagogics…).
Bilanç
Lo deputat s’engatja a far remontar tot aquò al MEN. Sa secretària es una maire d’escolana meuna, çò que pòt jogar per que las causas pòscan avançar. Anam veire. En mai d’escriure al ministre a previst de pausar una QE. Ai demandat que nos siaga fach un retorn de las accions menadas. Pas desfavorable, puslèu una coneissença encara tròp superficiala del dorsièr. Segur que nos va caler quichar mas pensi que podèm avançar.
Bruno DURANTON.
