Compte rendut del rescontre CREO de l’acadèmia de Tolosa – Rector B. Delaunay
Dijòus 19 de setembre, 4 oras del vèspre fins a 5 oras 10
Lòc : Rectorat de Tolosa, plaça Sant Ròc.
Presents : En Benoît Delaunay (rector, en fòto), Dòna Anne Val (directritz de cabinet), En Daidièr Agar (IPR d’occitan), Nicolau Rei-Bèthvéder (pdt CREO TLS) Emmanuel Isopet (secretari CREO TLS)
Ambient : apasimat, seriós e escota dels participants. Nombrosas presas de nòtas del Rector.
Introduccion del president del CREO :
Aprèp aver mercejat lo Rector per la rapiditat a respondre a la nòstra demanda de rescontre, faguèt una presentacion del CREO Tolosa, dont festegem lo 50n aniversari, puèi una presentacion de l’importància de l’ensenhament de l’occitan dins l’acadèmia (en efectiu e istoricament). Lo sosten a l’ensenhament de l’occitan foguèt copat l’an passat per la conjoncion de la reforma dels licèus e la decision rectorala de la fin dels mejans especifics. Aquò crèa una crisi sens precedent que los ensenhaires, los parents, los elegits comprenon pas.
Fa remarcar que los centenats d’elegits que se son manifestats contra aquestes cambiaments e per sostenir l’ensenhament de l’occitan son de totas tendéncias, de drecha, d’esquèrra e de la majoritat presidenciala. Levat lo RN, que sembla content d’aquesta politica. Deu far soscar…
LA DINTRADA
Lo secretari fa lo punt sus la pièger dintrada dempuèi d’annadas per l’occitan : pas de dubertura de seccion bilingua (bilingüisme declarat prioritat academica ça que la), reduccion de las oras e dels efectius en collègi en particular de l’iniciacion generalizada, barradura de 7 licèus e de grèus problèmas en licèus, pas de LVB al contrari de çò promés (L’Isla de Baish, Banhèras, Moissac, Sant Africa…), -45 % dels efectius, marrida informacion.
Demanda de remontar aquela realitat e nòstras demandas al Ministre e de tornar amodar una politica de desvolopament confòrma a la convencion que se deu signar lèu.
Lo Rector e l’IPR afirman qu’an pas las meteissas chifras, que seràn definitivas a la debuta d’octòbre. Refusan l’idèa d’una volontat d’anar contra l’ensenhament de l’occitan. Se los efectius an baissat los mejans son pas estats demesits.
RELANÇA DE LA POLITICA RECTORALA PER L’OCCITAN
Lo president del CREO TLS demanda una declaracion oficiala en favor d’una politica d’ensenhament de l’occitan e un acamp del CAEOC abans la fin de l’annada civila, coma prevista per l’anciana Rectritz. Demanda lo restabliment dels mejans reservats per l’occitan.
La Directritz de cabinet ditz qu’es pas encara arrestat a prepaus dels mejans per l’occitan, se seràn dins las DGH o a despart. (Es una evolucion notable del discors per rapòrt al mes de junh !). Pel CAEOC en decembre sembla pas pausar problèma.
CONSELHIÈRS PEDAGOGICS DEPARTAMENTALS D’OCCITAN (CPD)
CREO : Demandam lo restabliment d’al mens un CPD per departament. Insistissèm sul ligam entre los CPDs e la creacion des seccions bilinguas (SB). L’an passat se dubriguèt pas de SB tanben pr’amor que mancan de CPDs. Lo cas de l’Òlt es evocat.
L’IPR, sus la defensiva, nèga que la situacion de l’occitan dins lo departament baisse (dins lo primari). Fàcia a nòstras questions ditz que i a pas de CPD d’occitan pr’amor que i pas lo perfil que conven.
CREO : Evidentament li disèm lo contrari. Demandam se l’ancian CDP fasiá mal son trabalh ; l’IPR nos ditz de non. Demandam donc s’es un problèma de persona ? quin problèma pòt empachar lo retorn de l’ancian CPD ? Pas de responsa de l’IPR…
LAS SECCIONS BILINGUAS (SB)
Lo secretari del CREO : Passa als problèmas de nominacions dins las SB de Castras.
L’IPR ditz que la dificultat ven de mudasons e d’abandon de l’ensenhament de l’occitan per d’unes ensenhaires e de la manca de ressorças umanas. Demandam a poder aver una reflexion sus las rasons d’aqueles abandons : demotivacion, dificultats dels pòstes ?
CREO : -Demandam lo creacion de seccions bilinguas per l’an que ven e de botar l’accent sus la formacion e lo recrutament de regents que rejonh lo problèma que pausa la baissa d’efectius en licèu.
-Pel segondari demandam lo restabliment de l’iniciacion generalizada cada còp qu’es possible, en particular quand los ensenhaires son en jos servici per provesir las opcions.
-Demandam que pels bilingües doas oras de lengas sián asseguradas.
L’IPR ditz que i a plan pauc de cas ont los escolans an pas qu’una ora.
Demandam lo dubertura de l’ensenhament de l’occitan dins mai d’establiments (e non la barradura coma ongan).
Lo Rector afirma que los establiments qu’an barrat avián plan pauc d’escolans e fa fisança a l’excellenta coneissença del terren de l’IPR.
REFORMA BLANQUER DELS LICÈUS E UNIVERSITAT
Per la reforma del licèu demandam l’egalitat amb las lengas e culturas de l’Antiquitat (Latin-Grèc), la generalizacion de la possibilitat de la LVB. Parlam en particular lo cas sensible de Sant Africa. Tanben foguèron evocats Moissac e Banhèras.
La Directritz de cabinet, lo Rector e l’IPR son d’acòrdi per estudiar l’afar rapidament e informar oficialament los caps d’establiments que pòdon marcar d’escolans en occitan LVB (abans las primièras espròvas de contaròtla en cors d’annada).
Lo President rapèla que sens un nombre important de liceans, i aurà pas d’estudiants en occitan, donc pas pro de monde als concors de CRPE especial e CAPES, donc mai de dificultats en primari coma en segondari, es a dire rapidament la fin de l’ensenhament de l’occitan.
Senhalam que ja ongan l’universitat de Tolosa, ja aflaquida, enregistra una baissa de 12% de sos efectius en primièra annada.
Enfin demandam una informacion clara e objectiva dels collegians e liceans (en senhalant l’abséncia de l’occitan dins «l’informacion» del rectorat).
Lo Rector anóncia que l’OPLO trabalha sus aquesta informacion e que sauprem -benlèu-lo 15 d’octobre a quin moment la plaqueta serà disponibla.
CR del secretari del CREO Tolosa e anotat pel president.
