RESCONTRE CREO TLS – ÒC BI – NAVÈTH RECTOR DE TOLOSA.
Dimars 22 de seteme de 2020. Rectorat de Tolosa, Plaça Sent Ròc.
De 9h a 10h15.
Presents : Martina Ralú (Òc-Bi), E. Isopet (Pdt CREO TLS), N. Rei Bèthvéder (SG CREO TLS), Mostafà Fourar (Rector), Vincent Denis (SG Rectorat), Anne Val (Cap de Cabinet deu Rectorat), Daidièr Agar (IPR Occitan). Tot·a·s son mascats.
Ambient : Amassada tot en francés (lo CR es ua revirada). Seriós, ua grana escota deu rector que dèisha parlar tot lo monde.
Manu Isopet remercia lo Rector de mos recéber a la dintrada e la desira la planvenguda. Balha un libre suu bilingüisme au rector que se ditz interessat.
Martina Ralu parla de l’importància deu bilingüisme en parlar deu Bokmål e deu Nynorsk en Norvègia. Insistís suu hèit que i a encara de problèmas de manca d’ensenhants dins las Seccions bilinguas F-OC (SB).
NRB parla de la situacion catastrofica en licèu. Baisha deu 50 % deus efectius en occitan qu’es divuda automaticament a l’aplicacion de la refòrma en terminala.
I a pr’aquò ua progression positiva de l’efectiu dins los licèus on i a un EDS Occitan. Mès i a pas que tres licèus (Sent Sernin, Sent Africa e L’Isla de Baish) on i a aqueste EDS. Demandam la generalizacion de l’EDS Occcitan a tots los licèus on i a l’occitan (un vintenat). Es pas fòrça quan sabèm que passèm de 1 licèu sus 3 dambe l’occitan a l’acadèmia de Tolosa, contra 1 sus 8 actualament.
Demandam mei de lisibilitat sus la LVB Occitan.
Demandam l’egalitat dambe las LCAs (Latin-Grèc).
En mèi d’aquò, fragilizarà la dintrada universitària de 2021 vist l’ahoniment en licèu, e au delà es tot lo recrutament deus professors de SBs que s’ahonirà lèu se i a pas arren de hèit.
Isopet :
Ditz, en s’apujar sus las chifras de la darrèra enquista de l’OPLO, que lo 81% deus Occitans vòlen un desvolopament de la lenga occitana a las escòlas. Los eslegits tanben i son favorables.
Hè remarcar que la mesa en plaça (tornar) de las oras especificas se hascoc dins ua cèrta pagalha o un fosc qu’ei pas bon. Demanda la constitucion d’un grope de trabalh entà ajudar los servicis de l’acadèmia a tornar clara totas las situacions abans los CAEOCs. Refús deu SG que ditz que los servicis son acostumats a gerir peu melhor los mejans.
La situacion deu bilingüisme a Montauban s’a de clarificar entà las SBs en collègi en licèu.
Un mièi pòste de CPD OC de Tarn susprimit. Agar ditz qu’Olympe de Gouges damòra lo collègi entà las SBs
Cau hèr ua informacion clara aus cap d’establiment, pr’amor que i a de còps problèma suus terrenh. Cau benlèu ua circulara > Non deu rector entà la circulara rectorala entà l’occitan. Val ajusta que los caps d’establiment hèn tot çò que pòden entà l’occitan [sic] mès qu’an l’autonomia.
Demanda tanben entà la convencion sus l’ensenhament de l’occitan entre l’Estat e las collectivitats localas > Se harà après las senatorialas.
Vòu sàber se lo CAEOC se harà avant la fin de l’annada > Agar : Es pas fixat, mès segurament en deceme de 2020.
Mostafà Fourar – Navèth rector de l’acadèmia de Tolosa.
Estoc coma rector de la Guadalope e de la Reünion confrontat a societats bilinguas dambe lo Creòle e lo Francés. Cretz a l’enriquiment entau francés coma entau creòle que pòrta lo bilingüisme. Se ditz en favor deu bilingüisme : «Soi sensible a las lengas regionalas» e «L’institucion a un ròtle prumèr de jogar entau bilingüisme». Digoc qu’entenoc plan las nòstas demandas (Egalitat dambe las LCAs) las harà remontar au MEN. > «Vous pouvez compter sur moi pour remonter vos informations». Se mostrèc favorable a un comunicacion papèr (flyer) entà presentar l’ensenhament de l’occitan. «Il y a une fierté à faire de l’occitan».
Conclusion : Prumèr encontre d’observacion. En tot cas, avèm pas sentit d’oposicion a l’occitan. Après saber s’ei vertadèrament entau son desvolopament… Es ua auta istuèra.
CR de Nicolau Rei Bèthvéder, anotat per Manu Isopet.
