Mercé als fidèls e als valents qu’an represa la costuma de venir portar pèira a l’òbra collectiva. Nòstra preséncia a la nòv’Estivada nos a permés de reprene una tradicion anciana de preséncia de l’ensenhament public dins un eveniment dubèrt a totes.
A nòstra demanda, avèm partatjat l’estand amb nòstres partenaris d’OCBI, parents per l’ensenhament bilingue public. Coma de costuma, lo moment un pauc complicat foguèt aquel del montatge : cercar la melhora configuracion per la visibilitat, mas tanben ensajar de nos parar de la solelhada…
Moment esperat de partatge e de convivialitat a miègjorn amb l’arribada, dempuèi Nissa (òsca a el que s’èra levat plan matin) de nòstre president OLivier.
Sèm totjorn estats presents a l’Estivada, quina que ne siá l’organizacion o los responsables, e mai dins sas darrièras annadas. Aquesta preséncia de la FELCO, del CREO Lengadòc e d’OCBI es tanben un biais d’afortir la representativitat de l’ensenhament public de l’occitan al prèp dels festivalièrs e dels responsables politics.
Notam los escambis amb B. Assié, conselhièr regional en carga de l’occitan e del catalan a la Region, que representava C. Delga, la Region principala finançaira de la nòv’Estivada, amb Sarah Vidal, conselhièra departamentala d’Avairon, elegida d’oposicion a la comuna de Rodés e sosten ancian e fidèl de l’Estivada.
Notam tanben lo passatge a l’estand de Léon Thébault, collaborator de la 
senatritz Monique de Marco e candidat malurós del Novèl Front Popular a las legislativas (al centre sus la fòto). De remarcar que, coma cada còp, lo logo del collectiu » Pour que vivent nos langues » que la FELCO e OCBI ne son membres, èra plan vesedor sus l’estand e a son entorn. Mercejam Claire Gago-Chidaine, animatritz del collectiu d’aver passat un moment amb nosautres
Bona idèa dels organizators : de forums ont d’actors « istorics » o novèls de la cultura occitana poguèron donar son vejaire per una organizacion futura de l’eveniment. Lo psdt Pasquetti èra convidat a l’un d’entre eles per evocar la plaça de l’ensenhament public dins un festenal cultural e MJ Verny per parlar de la literatura, a costat d’autras intervenèiras que parlèron dança o arts visuals.
Los organizators anoncièron la tenguda d’una assemblada generala de totes los aderents per soscar democraticament a la seguida. Se sètz pas encara aderents, la causa se fai aquí : https://www.helloasso.com/associations/la-gardarem
Mercé a totes aqueles que prestèron ajuda. Se pòdon pas enumerar que ne mancariá, d’aqueles que carregèron, tenguèron l’estand, partatgèron un moment de convivialitat, recaptèron tot a la fin.
Qualques regrets : los dos jorns foguèron tròp corts per vertadièrament profitar dels escambis.
E de sovets : que lo festenal tòrne reprene una dimension temporala mai importanta e mai que s’espandiguèsse mai dins sa programacion e son finançament.
