Fondat e actiu dempuèi 2012, per la volontat de son cap-redactor Ferriòl Macip, Jornalet a ja capitat sa reconeissença coma quotidian numeric occitan tot en occitan, en tenent còp durant 10 ans malgrat de condicions precàrias.
D’unes an fòrça ajudat per lors contribucions, per lor sosten financièr e/o moral, per lor volontat de far conéisser l’unic numeric occitan.
Pasmens, Jornalet arriba a un moment decisiu que pòt menar a sa continuitat o a sa desaparicion. Ferriòl Macip s’amerita de sortir de la precarietat, mas ara per ara res o garentís pas. Las ajudas institucionalas son necessàrias mas insufisentas per que se faga una retribucion justa del trabalh complit, e dependon, en mai d’aquò, de situacions politicas malseguras, ja que i a pas de politca lingüistica vertadièra en favor de l’occitan. Es l’ensemble de l’occitanisme, non pas sonque qualques donators generoses, que se deu posicionar en favor de Jornalet.
Ensenhaire d’occitan, fau servir sovent los articles d’aqueste quotidian occitan dins mas practicas de classa, e soi segur que d’autres collègas o fan tanben. Seriá damatge que planguèssem la fin de Jornalet coma encara ploram la fin de La Setmana.
Per ajudar :
- podètz far dirèctament un don sul sit del jornal
- podètz mandar un chèc a : Los Amics de Jornalet, 6 Carrièra Victor Hugo, 11500 Quilhan
- podètz aderir a l’associacion Los Amics de Jornalet (ligam sul sit)
- podètz far un transferiment bancari en demandant lo RIB a amics.jornalet@gmail.com
Perdam pas lo mejan d’aver cada jorn d’actualitat en occitan !
Gerard Joan Barceló
