Trobaretz a la seguida lo rapòrt moral establitper lo president Olivier Pasquetti per l’Amassada generala del 2 de febrièr 2024
Relacions amb lo Ministèri
Per lo primièr còp en l’istòria de la FELCO, avem escambiat embé très ministres de l’Educacion nacionala diferents en un an solament.
Après 5 ans d’escambis de balords emb lo ministre Blanquer, aquela instabilitat ministeriala per lo premièr pòste budgetari de l’Estat implica que la FELCO recèu de respòstas d’un ministre, totjorn laconiqui e lenifianti, alora que las nòstras solicitacions, per exemple aquela sus la baissa dau nombre de pòstes au CAPES d’occitan, era adreiçada au sieu predecessor. Implica tanben que de conselhèrs ministerials descuerbon la situacion de l’ensenhament de l’occitan quora lu rescontram.
Sus lo fons, aquelu cambiaments de ministre modifican ren la paraula de l’Estat per cen que tòca a l’ensenhament de li lengas regionali, paraula elaborada ben probablament en defòra de la carrièra de Grenelle. A cada nominacion nòva, siam malurosament oblijats de tornar establir un contact embé un conselhèr ministerial que s’inscrieu coma novel interlocutor de la FELCO.
A doi represas aquest an, la FELCO foguèt presenta au ministèri per explicar la situacion dau nòstre ensenhament, pèjo, de còps, per la presentar. Aqueu nivèu de comunicacion que podem regretar emb lo ministeri nen condamna a adoptar sovènt una atituda defensiva tre qu’una anóncia generala ven menaçar lu aquesits passats. N’en vòli per pròva lo travalh complit per lo CA en reaccion a l’anóncia de la DGESCO sus lu sujèctes dau DNB per li seccions bilingui, e mai recentament li anóncias de l’ancian ministre Attal sus « le choc des savoirs ». Aquela darnièra anóncia impausa a la FELCO de si tenir atentiva e lesta a reagir emb lu sieu partenaris per li modalitats d’aplicacion que son a si declinar sus cen que rapresentarà segurament un ravage en collègi a la rintrada 2024 tant per l’organizacion dei emplecs dau temps coma per l’elaboracion dei grops-classa.
La FELCO e son travalh dins de collectius
Aqueu travalh de resisténcia a l’encòntre dau mespretz ministerial, la FELCO lo complisse en lo sieu nom, mas essencialament en prenent una part activa ai accions dau collectiéu PQVNL, de la FLAREP e de l’APLV.
Pour que vivent nos langues
La participacion au quinzenau d’acamps sus lo 2023, la participacion a la redaccion dei letras e comunicats de Pour Que Vivent Nos Langues an demandat ai rapresentants mandatats de la FELCO dintre aqueu collectieu d’i consacrar fòrça temps e energia per l’òbra collectiva tot en remembrant e en defendent l’especificitat de l’ensenhament public de l’occitan. Dintre aqueu collectieu eterogene, sensa gouvernança definida e sensa estructura precisa, li propòstas de la FELCO an de còps rescontrat silenci e denembri per non parlar d’atacas. En consequéncia, per fin de clarificar lo nòstre ròtle, estimam que per lo nòstre interès, imaginar un novel equilibre tra lo temps consacrat e l’energia despensada en lo travalh e l’accion d’aqueu collectieu serà bensai mai productieu per la nòstra associacion.
La nòstra AG si deurà donc interrogar sus la necessitat, ressentida per d’unes membres del burèu, de recentrar la reflexion a l’entorn de l’especificitat que rapresenta l’espaci d’oc, compausat de 4 regions e 8 acadèmias.
La FLAREP
L’organisacion a Niça dau 37en collòqui de la FLAREP es estat un exemple que n’en devèm tirar de leiçons. La capitada d’aquel eveniment es a ligar a doi réflexions estratègiqui. Es lo premièr còp en l’istòria qu’organizam un collòqui de la FLAREP sus lo territòri d’una region qu’a jamai augut de convencion Estat-Region per estructurar l’ensenhament de la lenga e desprovedida de tot ofici. Tanben, la causida de la temàtica dau collòqui, l’article 7 de la lei Molac, que serà per lo moment lo nòstre solet motiu d’esperança, deu s’inscriéure per la FELCO coma proritat de l’accion menada embé lu nòstres partenaris de la FLAREP.
A prepaus de la FLAREP, nos cal tanben notar que li remontadas de la FELCO – coma o remarcam tanben dins PQVNL – son pas totjorn seguidi. L’audiença que la FLAREP devia aver lo 18 de genièr, remandada au 15 de febrier, deuria èstre l’occasion, per nosautres FELCO e lu nòstres partenaris, de demandar au ministèri se de mesuras son estadi presi per considerar la situacion de l’ensenhament de l’occitan despí lo nòstre darnièr rescòntre dau 6 d’octòbre.
L’APLV
D’un biais regulièr e conscienciós, toti aqueli questions ligadi a l’ensenhament d’una lenga ancuèi e mai particularament a l’occitan son tanben portadi au ministèri mercés a l’accion de l’APLV dont lo rapresentant de la FELCO dintre aquela associacion ven d’èstre elegit un còp de mai au sieu CA. Aquò permete a la FELCO de portar la sieu vision dintre aquela estructura seriosa e professionala qu’escàmbia emb lo ministeri e de contribuir a la reflexion generala dei collègas ensenhaires de lenga viva. Notar que nòstre collèga demanda d’ajuda, es a dire d’adesions individualas e tanben de mond per prene sa seguida.
Relacions amb l’OPLO – Ofici public per la lenga occitana
De la nòstra relacion emb lo ministeri, n’es tanben question en lu rapòrts que tratenem emb l’OPLO. Despí la presa de foncion dau sieu novèu director, doi acamps si son tenguts per evocar la situacion de la convencion-cadre da venir e sus laquala lo travalh tra la FELCO e l’Ofici s’era ja ben endralhat 2 ans fa. Aquelu doi acamps an tanben permés de s’assegurar de la vision comuna tra OPLO e FELCO a prepaus de doi consideracions essenciali per nautres :
- la presa en còmpte dei acadèmias que si tròvan pas sus lo territòri de l’OPLO e doncas l’envuèia d’alargar lo relarc d’accion de l’ofici a de fins d’egalitat territoriali;
- la volontat de vèire una aplicacion corrècta e rasonada de l’article 7 de la lei Molac sus l’ensem de l’espaci d’oc.
Relacion amb los elegits e las organizacions sindicalas
Per avançar, l’ajuda dei collectivitats territoriali e dei sindicats n’es mai que necessària au dedintre dei CALR o en li negociacions emb lo ministeri. Avem jamai perdut de vista de lu solicitar sus lu subjèctes nacionals que tòcan a l’ensenhament de li lengas regionali e podem s’assegurar dau sieu sosten. De notar que lu collègas respòndon sovent presents a la convida d’estagis sindicals.
Justament, lo collòqui de la FLAREP a Nissa foguèt l’occasion de s’avisar de l’interès portat per aqueli estructuras a la question de l’ensenhament de li lengas regionali au travèrs de la presença dau segretari nacional de la FSU e de doi rapresentants de presidents de region. De notar tanben la preséncia de representants de la FELCO al rescontre del 5 de julhet a Tolosa, sota l’egida de la Region Occitanie-Pyrénées-Méditerranée, que recampèt elegits e universitaris de mantuna lenga regionala e mai militants, e foguèt l’ocasion de pausar li questions de l’article 7 de la lei Molac.
Vida intèrna
En la vida intèrna, avem cercat de respectar la volontat exprimida a l’AG passada de pas solicitar sistematicament l’integralitat dau CA en foncion dei subjèctes de reflexion per fin de pas negar lu collègas investits sota la totalitat dei dorsièrs. Per aquò, mercé lo travalh dau burèu e dei responsables dei comissions, fòrça dorsièrs foguèron travalhats denant d’èstre sotameses a l’ensem dau CA pi releiats per lu delegats academics a l’ensem dei collègas. Justament, saludi lo travalh dau secretariat per la creacion de la newsletter de la FELCO que d’un biais regulièr assabenta toi aquelu que li son abonats sus l’actualitat de la FELCO e per la creacion tanben d’una adreiça mail oficiala au nom de la FELCO. Aquelu otisses son en la dralha de credibilizacion de l’associacion e de visibilitat dau travalh menat au cada jorn per l’ensem dei collègas dau CA o autres.
Es aquela credibilitat, iniciada per l’accion dei mieus predecessors Felip Martel e Yan Lespoux que cerqui a mantenir mercés l’ajuda de vautres toi.
