La jornada comença per un acamp del CA, dubèrt a 11 oras, que sa foncion es de preparar l’AG.

A-   Compte rendut del CA

Clarificacion sus la data de l’AG causida per lo burèu

En seguida de las discussions de l’an passat, avèm plan soscat a remandar l’AG a la prima ; mas foguèt complicat ambe las vacanças sus diferentas zònas, las pòrtas dobèrtas, los montatges de projèctes… de trobar una data après febrièr. Prepausam de demorar sus çò qu’avèm totjorn fach per l’AG venenta : decembre o genièr.

Punt sus l’òrdre dau jorn de l’AG e proposicion de començar per lo « choc des savoirs »

Los rapòrts amb la FLAREP

Una audiéncia au ministèri èra prevista fin de genièr. Foguèt remandada après lo cambiament de ministre al 15 de heurèr. Dins la bocla FLAREP, la delegacion de 5 personas foguèt decidida, amb al dintre, Olivier coma representant de la FELCO. Refús del ministèri al motiu que voliam una delegacion de 4 personas. De mai, lo ministèri a remembrat qu’Olivier Pasquetti èra ja estat entendut ambe la FELCO a l’auton e sotentendut que la siá preséncia era pas necessària. I a aquí un doble problèma : manca de consideracion de cap a la FELCO e ingeréncia del Ministèri sus la composicion de la delegacion FLAREP. Notar que lo burèu FLAREP es estat solidari e a dich qu’èra pas question d’acceptar las condicions del Ministèri (limitacion de la delegacion e exclusion de la FELCO). MJ Verny senhala qu’aquesta solidaritat de la FLAREP es quicòm de fòrt positiu e marca un bon rapòrt de fòrças qu’es degut al trabalh d’Olivièr e a la capitada del collòqui de Nissa.

Punt sus las candidaturas au CA

En mai dels collègas presents, an confirmada lor candidatura :

• Fabienne Albert (CREO Lengadòc)
• Maria Boivert (CREO Tolosa)
• Gilbèrt Mercadièr (CREO Tolosa)
• Patrici Roques (CREO de la Talvèra)

Proposicion es facha a F. Jolibois (APLR) e Maxime Juniet (CREO Tolosa) de dintrar al CA. Proposicion acceptada. »

Lo debanament de l’AG

Lo psdt Olivièr Pasquetti prepausa l’OJ seguent

• lo « choc des savoirs»
• las situacions academicas,
• lo trabalh de la FELCO dins los divèrses collectius (APLV, Congrès, FLAREP, PQVNL)
• la presentacion e lo vòte dels rapòrts
• la question dels « pactes »
• la question dels servicis dins lo 2^nd gran mai que mai entre occitan e valéncia
• la formacion dels mèstres e lo dispositiu « Ensenhar »

B-  Compte rendut de l’AG

Presents

• Joan Barcelo (CREO Granòble),
• Benoit Bolano (CREO Lengadòc),
• Laura Bonnet (CREO Auvernha),
• Beatritz Bringué (CREO Lengadòc)
• Silvan Chabaud (CREO Lengadòc),
• Bruno Duranton (CREO Tolosa),
• Danis Galvier (CREO Lengadòc),
• Frederic Jolibois (APLR),
• Maxime Juniet (CREO Tolosa)
• Viginia Lago (CREO Tolosa)
• Sarah Laurens, (AELOC)
• Jeremia Marçais (APLR),
• Felip Martel (CREO Lengadòc),
• Frederic Martron (APLR),
• Olivier Pasquetti (APLR),
• Josette Soliva (CREO Lengadòc)
• Maria-Joana Verny (CREO Lengadòc),

Desencusats

• Fabienne Albert (CREO Lengadòc),
• Catherine Bataller (CREO Lengadòc),
• Maria Boivert (CREO Tolosa),
• Lionel Cayrol (CREO Tolosa)
• Maria-Anna Chateaureynaud (CREO Aquitània),
• Devà Dauriac (CREO Lengadòc),
• Tomàs Hirondelle (CREO Aquitània),
• Leo Humbert, (CREO Tolosa),
• Emmanuel Isopet (CREO Tolosa),
• Clamenç Masseillou (CREO Aquitània),
• Gilbert Mercadier (CREO Tolosa),
• Aimelina Recours (AELOC)
• Patrici Roques (CREO de la Talvèra)
• Isabelle Théron, (CREO Tolosa),

Debuta de l’AG 13h56.

Presa de paraula per Olivier Pasquetti. Presentacion de l’òrdre del jorn.

1 – Choc des savoirs

L’AG se dubrís per una discussion sus lo famós « choc des savoirs ». nòstre ensenhament risca de ne patir coma sovent quan las refòrmas pertòcan l’organizacion dels servicis. Olivièr Pasquetti demanda a las associacions academicas de faire lo punt sus l’estat de las anóncias de DHG per la dintrada. MJ demanda que la FELCO faga als collègas una letra simpla per explicar nòstras crentas e demandar un retorn sus las situacions dins los establiments.

NB : dempuèi l’AG, una comission s’es mesa al trabalh per elaborar un questionari de prepausar als collègas. Aqueste questionari serà tanben comunicat als partenaris de « Pour que vivent nos langues » amb libertat de se’n servir dins lors acadèmias.

En collègi

Per lo psdt Olivièr Pasquetti, a la dintrada 2024, lo collègi risca de conéisser lo chaple qu’a conegut lo licèu amb la refòrma Blanquer per de qué tòca a l’organizacion, mai que mai als grops classsas e als emplecs del temps. Lo collectiu Pour que vivent nos langues a ja reagit cap a tot aquò en sotlinhar la situacion dels ensenahments intensius (collègis bilingues.

Mai d’un collèga (Maxime, Beatritz, Virginia, Bruno) senhalan la proteccion que representan las oras flechadas / sagetadas. Olivièr rampèla qu’es la posicion de la FELCO. Mai d’un.a (Frederic, Joan, Sarah) fan remarcar lo fosc ont ne sèm al moment de l’AG : d’unas opcions o grops (tecno, sciéncias) son ja estat suprimits. Es que l’occitan serà lo seguent ? E pasmens, Beatriz crenta que per la zòna A tot siá jogat al moment de las vacanças de febrièr (8/02)

Dins lo primièr gra

Per Olivier, i a una risca de reduccion de la libertat pedagogica. Jeremia e Benoit afortisson aquesta crenta amb la question dels manuals que riscan d’èsser impausats.

Sus la question dels manuals Beatritz evòca una formacion sus los novèls manuals amb la risca d’aumentar la part dels metòds en linha amb la demesida de la valor de l’acte pedagogic e la risca d’aumentacion de las inegalitats.

Quina accion ?

Un còp tornadas las responsas dels collègas, MJV prepausa d’escriure als desputats sus la question del « choc des savoirs ». Per OP, cal que la letra siá centrada sus l’ensenhament public. F. Martel senhala l’importança d’aver d’exemples de situacions precisas.

La data de fin de febrièr es evocada per aquò.

Bruno Duranton fai remarcar que las letras de la FELCO als deputats an mai de pes se son apuejadas per las associacions academicas dins cada circonscripcion.

Un punt sus una contribucion de Maria-Anna Chateaureynaud, deseucusada sus la refòrma de l’INSPE en cors, sus lo retorn de l’opcion Lenga regionala dins lo CRPE especific e la manca de manuals actualizats

2- Torn de las acadèmias

Clarmont

Una convencion academica es en cors d’estudi, que seriá estada escricha a partir de la convencion Occitània. Es estada acceptada per la DSDEN. Es dins le burèu del rectorat ; pas de retorn peu moment.

L’occitan concernís 2000 escolans pel primari. Ensenhament de sensibilizacion fach per 2 collègas = 1 pòste + 1 mièg-pòste). Dins lo segondari : un sol collèga sus 6 collègis

Montpelhièr

Le CREO se pòrta plan (100 aderents en debuta d’annada). L’ambient amb l’administracion es puslèu bon dempuèi 2 ans : 2 grops de trabalh per an e per dept, 2 CALR per an. Lo gròs problèma es aquel de la manca de ressorças umanas. I a una contradiccion entre lo trabalh positiu dins les GT e lo contèxte global : la manca de mejans fragiliza las duberturas de sites bilingues que progressan, mai que mai dins Erau. Aquesta fragilitat risca d’aparéisser als uelhs dels parents e pesar sus la fisança que fan al bilinguisme…

La situacion dins lo segond gra es catastrofica : 30 profs que mai de la mitat de lor servici es facha dins la valéncia, sens compensacion per la disciplina. Es un cèrcle viciós : la barradura de l’occitan dins mantun establiment fa que los collègas, se vòlon pas aver un servici impossible subretot après de decènis de carrièra, preferisson completar lor servici en defòra de l’occitan. La situacion pesa sus la facultat que manca d’estudiants post-bac, e mai se la manca es compensada per los estudiants del dispositiu Ensenhar e la licéncia en 1 an del servici de la formacion contunhada.

A Montpelhièr, se tira un bilanç positiu de la formacion « Ensenhar qu’es assegurada per la fac qu’a obtengut lo « mercat » de l’OPLO après presas de posicions netas del CREO : pas question de fisar a d’oficinas privadas la formacion dels mèstres del public quand i a de collègas competents a la fac e a l’INSPE. Los collègas pòdon validar una licéncia d’occitan a la fin de lor formacion. Lor afectacion, per lo moment, s’es jamai facha al detriment dels collègas certificats d’occitan : son causits en foncion de lor motivacion e dels « traucs » del terren. Los novèls collègas nommats s’intègran plan e seguisson las formacions amb los collègas certificats.

Ais-Marselha

Pas tròp d’informacions. Pas de desenvelopament dins le public. Pas de nòvas sus la convencion comuna ambe Nissa. La cargada de mission d’inspeccion fai de bon trabalh. Ensajam de pas perder d’oras. I arribam mas per quant de temps ? Cal tornar pujar en primari. Cal ensajar de tornar pujar les efectius e tornar trobar las oras. Dins Aups, totjorn res dins lo segondari mai l’inspectritz i travalha... L’associatiu s’estabiliza.

Granòble

Es mai que mai lo desèrt amb un sol professor que fa qualquas oras d’opcion en complement de son servici d’agregat de letras. Las oras que se fasián a Nyons i a 3 o 4 ans per una vacatària foguèron suprimidas fauta de pòste-supòrt quand aquesta aguèt lo CAPES e foguèt afectada dins l’acadèmia de Montpelhièr. Dins lo 1^èr grad, una persona fai d’iniciacion a Nyons. Discussion sus l’eventualitat d’organizar una formacion per l’occitan a partir de la dintrada 2024. Un cargat de mission LR – Marc Bron, professor de franco-provençal – es estat nommat. Una IPR d’espanhòl seguís tanben la question. Olivièr suggerís de s’apuejar sus l’aquesit recent de la reconeissença del franco-provençal.

Nissa

1^èr grad : Opcion/sensibilizacion : coma i a pas de CPD, avèm pas de vision de çò que se pòt faire, ni ont son les professors que poirián contribuir al desvolopament.

Sites bilingues : 1 dins Var, 2 a Nissa. Es malaisit de d’assegurar la continuitat pr’amor de la reputacion del collègi de sector : los dròlles van dins le privat.

Existís una pichòta formacion pel 1^er e 2^nd grad pels començaires e pels qu’an ja fait d’occitan : s’agís de reactivacion e de mesa a nivèl per poder ensenhar en lenga. Mas sens CPD es pas possible de seguir los collègas formats. Ont començar per recençar lo monde ? Patissèm d’un imatge gaire positiu e mai se las condicions dels pòstes bilingues, coma la populacion concernida son pas tant marridas.

2^nd grad : la rectritz es pas defavorabla e puslèu attentiva al drech, es coma aquò que la formacion es estada mesa en plaça. Problèma de la crisi dels recrutaments. Urosament i a collègas qu’an passat la certificacion, çò que permetèt una dubertura a Draguinhan. 36 oras flechadas permeton d’afrontar las situacions de crisi e facilitar d’oberturas. Favorizan las filièras per bassins.

Tolosa

Los efectius son estables en bilingue e en opcional. Per aquesta forma d’ensenhament aquesta estabilitat amaga una pèrta de las grandas las annadas precedentas e la situacion es totjorn inquietanta. En bilingue, l’estabilitat, malgrat la pujada de las coòrtas, testimònia tanben del fèble nombre d’obertura de seccions.

Existís un ensenahment de sensibilizacion dins d’unes despartaments.

Las situacions son diferentas pels grops de trabalh segon los departaments : dificil dins Òlt per exemple. Dins Tarn foguèt convocat la velha deu CAEOC (= CALR). Segon los departaments, los sindicats i son pas totjorn convidats tanpauc.

Del costat deu Rectorat, una avançada positiva damb una nòta de cadratge de l’ensenhament de l’occitan a destinacion de totes les caps d’establiments.

Bordèu

Clamenç Masseillou, desencusat, nos a mandat la contribucion seguenta

– Situacion del Capoc : clavat despuish fin de noveme sus decision nacionau e rectorat, que son a recrutar un prefigurator, çò qui pausa question sus l’aviéner d’aquesta estructura. Qué van cambiar ? E serà dab los medishs mejans ? E serà au servici deus utis e mejans indispensable aus professors e a l’ensenhament de l’occitan ? Quan de temps e va durar abanç d’arretrobar un servici?

• Lenga de las espròvas : refús del rectorat de tradusir las espròvas en LVR.
• Opcions dusau grad : baishada deus effectifs
• Primier gra : purmèra classa a 75 per cent d’occitan en mairau public per la rentrada a Gan en Béarn. Que demoram sus un ritme de 2 o 3 creacions de cordera bilingua per an sus Aquitània.
• Vida deu CREO : naveths aderents d’òlt e garonna: creacion d’ua antena avançada.
• Ressorsas umanas : Ua situacion particulierament complicada en Gironde dab la manca de professors.

La Talvèra – Paris e autres luòcs fòra espaci occitan

NB : contribucion escricha de Patrici Roques, desencusat.

Sens cambiament dins lo 1èr e lo 2^nd gra : pas cap cors dins la region Iscla–de–França, ni dins las autras regions fòra Occitània. Pel moment, i a pas de contact amb lo superior : Benlèu lors condicions de trabalh e l’alunhament del « país », onte demòran, lor permeton pas un investiment a París. De notar las recèrcas de Nicolas Quint suls parlars del Creissent e las de Gerard Ligozat sul vivaro–alpenc.

Lo CREO – Talvera representèt la FELCO al Salon Linguafest los 29, 30 de setembre e lo 1èr d’octobre 2023 a París. Venda de libres mas pauques contactes.

Remarca complementària :

Nòstras fòrças essent estequidas, pensam que nos seriá probablament dificile de participar d’un biais eficaç a una accion collectiva menada per PQVNL a París en 2024.

MAS pensam que cal contunhar de mostrar una preséncia al mens simbolica de la FELCO dins la region Iscla–de França, dins l’espèr de jorns melhors.

3- Vòta deus rapòrts

Lo rapòrt moral (http://www.felco-creo.org/02-02-55-raport-moral-felco/) es legit per lo president qu’es mercejat per l’AG de son trabalh, de sa reactivitat e de sas qualitats d’escota e de diplomacia a regard dels collègas coma dels partenaris

Rapòrt morau votat a l’unanimitat

Presentacion deu rapòrt financièr per Bruno Duranton : http://www.felco-creo.org/26-01-24-raport-financier-felco-2023/. Lo psdt sotlinha la qualitat del trabalh de Bruno e de Laura, subretot aquesta annada ont a calgut montar lo budgècte complicat de la FLAREP

Votat a l’unanimitat

Lo rapòrt d’activitat (que demanda pas de vòte) es en linha aquí : http://www.felco-creo.org/02-02-24-raport-dactivitats-felco-2024/

4 – Eleccion deu CA

Candidat.as

• Fabienne Albert, CREO Lengadòc (1^er gra)
• Maria Boivert, CREO Tolosa (2^nd gra)
• Sylvan Chabaud, CREO Lengadòc (Universitat)
• Marie-Anne Chateaureynaud, CREO Aquitània (INSPE)
• Bruno Duranton, CREO Tolosa (2^nd gra)
• Denis Galvier, CREO Lengadòc, (1^er gra)
• Thomas Hirondelle, CREO Aquitània (2^nd gra)
• Frédéric Jolibois, APLR (2^nd gra)
• Maxime Juniet, CREO Tolosa (2^nd gra)
• Philippe Martel, CREO Lengadòc (Universitat)
• Gilbert Mercadier, CREO Tolosa (2^nd gra)
• Olivier Pasquetti, APLR (2^nd gra)
• Aimelina Reocurs, AELOC (2^nd gra)
• Marie-Jeanne Verny, CREO Lengadòc  (Universitat).

Représentant.as academics

• Montpellhièr : Benoît Bolano (1^er gra) e Béatrice Bringué (2^nd gra)
• Ais – Marselha : Sarah Laurent (2^nd gra) e Marie Françoise Lamothe (1^er gra)
• Auvernha : Laura Bonnet (1^er gra)
• Tolosa : Jean-Baptiste Courcelle(1^er gra) e Virginie Lago (2^nd gra)
• Aquitània : Clément Masseillou (1^er gra) e Nadège Pehau (2^nd gra)
• Granòble : Joan Barceló (2^nd gra)
• Nissa : Frederic Martron (2^nd gra)e Jérémy Marçais (1^er gra)
• La Talvèra : Patrici Roques (2^nd gra)

Lo CA es elegit a l’unanimitat

5 – Eleccion del burèu

Se pòrtan candidat.as

• Bruno Duranton e Laure Bonnet : clavaires
• Marie-Jeanne Verny e Lago Virginie : co secretàrias
• Vice president : Joan Barcelo
• President : Olivier Pasquetti

Lo burèu elegit a l’unanimitat

N.B: un còp lo CA e lo burèu reorganizats, lu responsables de comission an confirmat de ben voler continuar lo ròtle de responsable d’un nivèu d’escolaritat qu’ocupavan ja e coma segue :

• responsable 1^er gra : Fabienne Albert,
• responsabla collègi : Virginia Lago,
• responsabla licèu : Maria-Nadala Pieracci
• responsabla INSPE: Maria-Anna Chateaureynaud

6 – Mandatats pels ligams dambe les autres collectius e associacions :

L’AG rampèla que los collègas que sos noms seguisson representan la FELCO al ditnre de las estructuras, que consultan cada còp qu’es possible lo burèu e lo CA de la FELCO abans tota presa de posicion en defòra dels mandats donats per l’AG.

• FLAREP : Olivier Pasquetti
• APLV : Beatritz Bringué + Joan BARCELO + Patrici ROQUES = unanimitat
• PQVNL : Marie-Jeanne VERNY + Virginie LAGO = unanimitat
• Le CONGRES : Maxime JUNIET + Joan BARCELO = unanimitat

7 – Reformas : choc des savoirs, pactes, servicis…

Los collègas venguts a l’AG confirman las inquietuds presentadas lo matin en CA, mai que mai a prepaus de la reforma dels collègis. De crentas pesan sus la dintrada 2024 mai que mai en causa de l’organizacion dels establiments (emplecs del temps) e de la risca de sacrificis dels ensenhaments opcionals per la mesa en plaça – sens cap de mejans suplementaris – dels grops de nivèl. Lo besonh se fai sentir de reculhir d’informacions mai fisablas.

De collègas alertan sus de practicas relativas al pacte : d’unes caps d’establiments prepausarián de pactes per ensenhar las opcions e estalviar aital d’oras de lor autonomiia. Sus proposicion del CA del matin, l’AG vòta un textòt, redigit per F. MARTEL, per denonciar aquelas manòbras.

Des enseignants d’occitan exerçant dans le premier degré, dans des collèges et dans des lycées ont alerté la FELCO à propos des tentatives de certains chefs d’établissements de conditionner le maintien d’un enseignement optionnel de langue d’oc à la signature d’un PACTE. Sans se prononcer, en termes moraux, sur de telles tentatives, ni sur le principe général du PACTE, la FELCO tient à rappeler que l’option occitan-langue d’oc fait partie intégrante de l’offre d’enseignement dans le cadre de l’horaire normal telle que prévue par l’article 7 de la loi du 21 Mai 2021 relative à la protection patrimoniale des langues régionales et à leur promotion, et n’a donc pas à être soumise à quelque traitement conditionnel, voire discriminatoire que ce soit. La FELCO demande donc au Ministère de vouloir bien faire savoir aux chefs d’établissement qu’il n’est pas possible de lier l’option d’occitan à la signature d’un PACTE.

Lo tèxt serà difusit : http://www.felco-creo.org/a-propos-du-pacte-communique-de-la-felco/

La contribucion de de Maria-Anna Chateaureynaud sus la reforma – en cors – de la formacion dels mèstres es evocada ; pasmens l’AG a pas totes los elements al nivèl academic. Evocat tanben lo besonh de retorn de l’opcion Lenga regionala dins lo CRPE especific e la manca de manuals actualizats

Escambis sus la formacion « Ensenhar » : a Montpelhièr se’n tira un bilanç positiu : la formacion es assegurada per la fac qu’a obtengut lo « mercat » de l’OPLO après presas de posicions netas del CREO : pas question de fisar a d’oficinas privadas la formacion dels mèstres del public quand i a de collègas competents a la fac e a l’INSPE. Los collègas pòdon validar una licéncia d’occitan a la fin de lor formacion. Lor afectacion, per lo moment, s’es jamai facha al detriment dels collègas certificats d’occitan : son causits en foncion de lor motivacion e dels « traucs » del terren.

8- Lo trabalh dins los diferents collectius

Pour que vivent nos langues

• Lo positiu

Lo collectiu existís dempuèi 2019 e ten totjorn. Un cert nombre d’accions son estadas menadas que la FELCO i a presa tota sa part. I son representadas la màger part de las lengas e las principalas associacion. Las reunions son nombrosas e las decisions sotmesas, la màger part del temps, a totes. Lo collectiu beneficia del trabalh en granda part militant dels collaborators de F. Alfonsi e de P. Molac. Lo sit https://www.pourqueviventnoslangues.org/ es entretengut per R. Kerbiquet de Kelenomp (associacion dels professors de breton), amb l’ajuda .

• Lo negatiu
  • Un cèrt unanimisme que refusa las discussions de fons… Del còp, sèm « condemnats » a un activisme sus de basas intellectualas e ideologicas flacas quand se compara al nivèl intellectual de las luchas dels primadièrs dels ans 70…
  • Dificultat de faire comprene la complexitat de l’espaci occitan. Los collègas bascos per exemple, veson las causas amb un agach sus ½ departament, que sa lenga es dinamica, amb de mejans militants e de mejans institucionals que pòdon semblar colossals vistes per las autras lengas
  • Dificultat al nom del « collectiu » de faire entendre l’especificitat de l’ensenhament public amb lo potencial de desvolopament que representa, mai que mai dins l’amira de l’article 7 de la lei de 2021 ; sentiment que, per aqueles que son presents, es mai que mai lo socit de l’associatiu que domina. En tot cas, al nivèl dels ensenhaires (es diferent pels parents : OCBI e DIV YEZH fan plan lor trabalh), i a pas que la FELCO que portèsse la paraula dels professors del public
  • Problèma de gobernança : i a dins lo collectiu d’associacions, coma la FELCO, que demandan un mandat precís abans las decisions ; mas i a d’individus que parlan sens que l’òm siá segurs que son portaires d’un mandat… d’aquí impression desagradiva, mai d’un còp, dels limits del foncionament democratic. Notar que lo relevat de decisions escrupulosament establit cada setmana per R. Kerbiquet, sembla pas consultat per totes, çò qu’es un signe de son eficacitat relativa.
  • Subretot, pes enòrme de trabalh degut a l’assisténcia a TOTES los acamps e a la preparacion d’aquestes. Los otisses tipe DRIVE que son estats renduts obligatòris facilitan pas brica l’escritura de tèxtes en lenga e estile corrècte, d’aquí d’oras de correccion. En consequéncia d’aquò, MJ a l’impression de sacrificar un pauc tròp la FELCO.

Punt es fach sus l’accion en cors decidada dins un acamp parisenc (8 de novembre) que la FELCO i poguèt pas èsser. S’agissiá de faire montar de liceans cap a Paris lo 7 de febrièr per rescontrar lo grop d’estudis lengas regionalas de l’Assemblada nacionala. La FELCO foguèt pas partida prenenta de l’accion per de rasons de responsabilitat juridica e administrativa. Per aquestas rasons, los liceans presents a Paris son, dins lor granda majoritat, d’escolans de l’associatiu basc e breton + de bretons del public encadrats per los parents de Div Yezh (los parents o pòdon, que son juridicament responsables) + 2 Còrses d’una associacion qu’aviam JAMAI vista aperabans dins los acamps de trabalh + 1 liceana d’un licèu public alsacian acompanhada per l’association Eltern, 2 liceans de Calandreta (segon las chifras, al licèu Calandreta, i a un total d’entre 8 e 15 liceans… per 32 depts) representants de l’occitan. Los joves se son auto-organizats, amb, o cal dire, los conselhs dels adultes per evitar tota deriva. Lor es plan estat dich que representavan lo collectiu e donc pas tal o tal mahum (associatiu o public). De notar que 3 acamps se son tenguts amb los liceans e qu’aquestes se son mostrats plan imaginatius e dinamics.

NB : après l’AG e après l’accion : una reunion del collectiu ne tirèt un bilanç positiu e notèt una bona cobertura de premsa, l’implicacion d’una novèla generacion e la creacion de ligams entre los joves de lengas diferentas.

FLAREP

A la FLAREP tanben, avèm l’impression qu’an de mal de comprene l’especificitat de l’occitan. Mas la FLAREP es centrada sul public, çò que facilita las presas de posicion. Al nivèl de l’organizacion intèrna, i a un novèl vice-president de mai, Eddy PENVEN, lo president de Div Yezh. Notar que la FELCO e Div Yezh an sovent de posicions comunas dins la FLAREP.

1. En complement, legir lo compte rendut del CA

APLV – Association des professeurs de langues vivantes

L’APLV es una associacion mai que centenària que defend a l’encòp lo principi de la diversitat d’ofèrta d’ensenhament de Lengas  vivas estrangièras e regionalas e la qualitat de l’ensenhament de las lengas. La FELCO n’es aderenta dempuèi de decènis e avèm al dintre del CA nòstre collèga Patrici Roques, del CREO de la Talvèra. Legir lo compte rendut d’activitat d’aqueste : http://www.felco-creo.org/30-01-24-compte-rendu-dacitivitat-al-dintre-de-laplv-per-patrici-roques-delegat-felco/. Per sosténer nòstre collèga, caldriá maitas adesions individualas. Aquestas adesions son indispensablas per que qualqu’un pòsca dintrar al CA de l’APLV (al cap de 2 ans d’adesion). Beatritz Bringué se prepausa e l’AG la merceja.

Le Congrés

Lo Congrès, coma otís de regulacion de la lenga, de bastison d’otisses modèrnes, es un organisme mai que preciós que tot lo mond ne saluda lo trabalh e la qualitat. De collègas linguistas universitaris (Lieutard, Sauzet) i son dedins e dos joves, l’un titulari d’un doctorat de linguistica sus lo vivaro-alpenc e l’autre ingeniaire en informatica, titulari d’una licéncia d’occitan e estudiant de Master, venon de i dintrar en CDD. Tot aquò, a priori, permetde validar la qualitat scientifica dels otisses fargats.

Pasmens torna la sempitèrna question del Congrès vengut federacion d’associacions amb possibilitat d’intervenir sus un terren militant (al dintre de PQVNL, per exemple). Aquela mission novèla, adoptada dins una AG sens consultacion prealabla dels mandats dels uns e dels autres, necessitariá a minima la mesa en plaça d’aquesta consultacion.

La FELCO i a agut mai d’un representant (S. Carles, C. Chadeuil, J. Barcelo). Mas jamai lo burèu de la FELCO a pas agut cap de demanda de mandat per tala o tala decision politica del Congrès. Es una question que MJ Verny pausa de longa e qu’a jamai cap de responsa. Pagar una cotizacion d’associacion d’usatgièrs li sembla indispensable, mas una cotisacion de membre d’una federacion demandariá un foncionament de federacion, çò qu’es pas lo cas.

L’AG es clavada a 5 oras e mièja e mai d’un.a se felicita del vam, de la fisança e de l’escota recipròcas

Compte-rendut finalizat per Maria-Joana Verny,
a partir de las nòtas de Virginia Lago,
relegit per l’ensemble dels membres del burèu.