Lo dimars 23 d’abrial dins lo vespre, la classa bilingüa de CE1- CE2 de l’escòla Madame de Sévigné recebèt l’autor de BD Mancho per un escambi tot en occitan.
Los escolans avián pogut legir las BD daissadas a lor disposicion en classa e an trabalhat collectivament sus las tematicas abordadas dins l’òbra per puèi rescontrar son autor en classa.
Lo primièr temps foguèt consacrat a las questions dels enfants sul mestièr d’escriveire e sus las aventuras de son eròi, Dracon. Puèi, Mancho ensenhèt als enfants cossí dessenhar aquel Dracon e li donar d’expressions facialas.
Un còp los enfants prestes, se metèron en binòm per crear un triptic a l’entorn de « Dracon a l’escòla ».
Mancho los guidèt dins lor creacion grafica e scenaristica. D’aquí una novela BD es nascuda que podètz veire sus aqueste ligam : https://www.felco-creo.org/23-04-24-dracon-a-lescola-sevigne-de-montpelhier/
Los enfants contunhan de dessenhar lor personatge e de tornar legir las doas BD de Mancho e la qu’an creada amb totjorn lo meteis plaser.
Aquelas plancas, religadas en un libre, van d’ostal en ostal cada setmana per que cada familha pòsca veire l’òbra que son fièrs de presentar.
