LEI GABIANS
Parlarem ai gabians escambarlant lei nivols
Coma tu s’adraiant au tocant de la nuech
A l’agrat de l’Espèr encocarem l’andana
Escufunha de soleu ai parets de l’enòdi
E lo paure Germain Nouveau en tèrra de Porriera
Au ventre de sa maire si faguèt enterrar
Cantatz encar cigalas a l’estiu cracinant
Que lo soleu chavira e Venturi vèn blau.
Calant a Vilavièlha ‘mé lo Frederic
Franc dau Bèn franc dau Mau seguirrem lei prefums
E cantarem “Bodin ò la gròssa racalha
As ta lei coma una sartalha”
Auràn bèu t’embarrar ai barris de l’asile
Lo soleu convulsiu crebarà son bofin
E dau paure Tonin lei paraulas espelhadas
Tancaràn lo ponch finau a l’òrle dei matins
Dins una aubèrga vièlha lo Bodon e Sancho Pançà
Braman de vilanèlas ai morres enfarinats
Vé lo Bodon que s’encanha e tabassa un tam-tam
Aura de Berberia si crèi per l’Achorà
E lo collèga Leò vend de barba a papà.
Sus lo camin romieu l’autra nuech rescontrèri
Un vièlh espelhandrat si sonava Bellaud
Que sempre “sus Bidon sus Bidet sus Bidèla”
Lei plenei pòchas d’èrba s’enanava cantar
Escotarem encara l’òme de la camba unica
Que dins la Concepcion fasia pus que plorar
Tu lo Rimbaud empesat de l’aur de ta talhòla
E lo pas dei maçons per la nòva ciutat.
Nòtas :
– aquel tèxt supèrbe de Joan Pèire Belmon, que nos quitèt a la debuta de l’auton 2016, foguèt cantat per Frederic dins las annadas 78-82. Ventadorn VS3L69
– Germain Nouveau, poèta nascut en 1851 a Porrièra dins Var ont moriguèt en 1920. Cf. http://www.lespoetes.net/poete-96-Germain-NOUVEAU.html.
– Rimbaud finiguèt sa vida a l’espital de la Concepcion a Marselha
– http://www.terresdecrivains.com/Nietzsche-a-Nice
– « Frederic » désigne Nietzche, qui séjourna à Nice et fit plusieurs excursions dans l’arrière-pays. Un sentier de randonnée près d’Èze porte d’ailleurs son nom. Le château de Villevieille se trouve également au Nord de Nice.
