Lo ministèri
CF : https://www.felco-creo.org/category/nostras-accions/la-felco-e-lo-ministeri/
L’accion de la FELCO dapé lo ministèri es marcada en lo 2024 per un cambiament en la continuitat. Lu cambiaments ministerials que devenon repetitius nos a pas empedits de renovelar d’un biais regulièr de demandas d’audienças, coma aquela en seguida de la presa de foncion de la ministre Belloubet en febrièr passat, concretizada per la nòstra recepcion carrièra de Grenelle au mes de mai. Damont, a Paris, es estada un còup de mai l’ocasion de sensibilizar e formar lu nòstres interlocutors que semblan sempre descurbir la situacion de l’ensenhament public de l’occitan e que càmbian au ritme dei ministres. L’idea d’occupar lo terren tre que lo podem, qu que sigon lu nòstres interlocutors ministerials, es demorada la dralha essenciala qu’avem seguida. Aquela instabilitat ministeriala illustrada per la nominacion successiva de 4 ministres de l’Educacion nacionala en una soleta annada (Oudea-Castera, Belloubet, Genetet, Borne) adicionada a la preoccupacion governamentala de la recerca d’un budget a augut rason de la nòstra relacion emb lo ministèri sus la fin de l’annada 2024, l’escambi lunari que la FELCO a augut emb la Ministre Genetet au mes de novembre n’es aquí tanben una bela illustracion. Maugrat la decision qu’avem presa de mandar en amont de l’audiença dau mes de mai lo dorsièr acompanhat d’elements de discussion, maugrat li diversi relanças qu’avem effectuadi, fòrça es de constatar e regretar que despi quauqu meses, lo ministèri pren plus la pena de considerar lu nòstres corrièrs e alertas sus la situacion dau nòstre ensenhament e manifesta en consequença una desconoissença maja sus la question de l’occitan a l’escòla publica. Devem considerar aquela situacion coma un cambiament de la posicion ministeriala après l’esperança que nasquet en seguida de la lei Molac e mai que mai de la circulara de decembre dau 2021. Per faire frònt a aquela situacion nòva, lo cambiament de DGESCO e a un gra diferent d’Inspector General a la fin de l’annada 2024 amb una novèla inspectritz, a qu avem pas mancat de sollicitar una audiença serà bensai una ocasion d’interpelar d’interlocutors ministerials sus de sujèctes que relevan dei sieu relargs respectius.
Deputats e senators
Cf. https://www.felco-creo.org/category/l-occitan-e-la-vida-publica/deputats-e-senators/
Per faire frònt a aquela situacion nòva, l’ajuda dei elegits nacionals, deputats e senators es tanben essenciala. En aquesta fin, la FELCO s’es adreiçada a l’ensem dei deputats e senators occitans (drecha extrèma exceptada) au mes de març passat. En mai dei questions escrichi o orali pausadi au governament emb una frequença regulara per d’elegits sensibles a li nòstri questions, aquela sollicitacion a permés tanben un acamp en visio emb lo deputat Cazeneuve (Jean-René, Gers) qu’era a l’epoca raportaire general dau budget e membre de la majoritat parlementària. Aquela sollicitacion dei elegits nacionals per la FELCO nos a menats, fedels a la nòstra estrategia, a l’interpelacion dei candidats LREM, LR e NFP per li votacions legislativi durant lo mes de junh, consequença de la dissolucion de l’Assemblada nacionala. Aquela accion menada a ben es un motieu de fiertat per doi rasons : la mancança de temps dintre l’empressament qu’environava aqueli votacions pas previsti e lo trantalh de quauqu partenaris occitans qu’an pas poscut si metre en camin per menar aquela accion emb nautres. Recentament, la FELCO ven de s’adreiçar au senator Brisson, raportaire d’una commission sus l’evaluacion de la lei Molac per li significar que si tenem a la sieu disposicion.
L’OPLO
https://www.felco-creo.org/category/l-occitan-e-la-vida-publica/collectivitats-territorialas/
A un gra intermediari tra Estat e Regions, la FELCO participèt lo 5 de setembre a un acamp organizat per l’OPLO sus lo subjècte dau renovelament de la convencion-quadre, subjècte que sembla per lo moment empautat. Vòli rengraciar lu collègas que si rendèron disponibles durant lo mes d’aost per aprestar lo dorsièr de contribucion demandat per l’Ofici. Aquí tanben, mancam jamai l’occasion de remembrar la presa en consideracion de tot l’espaci d’òc e pas unicament li 2 Regions integradi dintre l’OPLO, posicion que tròva una escota dapé lu nòstres interlocutors de l’Ofici. Per pròva, en seguida d’aquest acamp, la FELCO, releiada per la presidença e la vici-presidença de l’OPLO, escriguet ai presidents de region AURA e PACA per lu assabentar dau travalh interregional menat en l’interès de l’ensenhament de la lenga d’òc en esperant a terme que de partenariats espelissesson tra l’OPLO e li 2 Regions que si tròvan fòra dau territòri de l’OPLO.
Sindicats, federacions, collectius (FLAREP, APLV, Congrès, PQVNL)
Li questions, subjèctes e problèmas que solevam tròvan un resson en li posicions dei sindicats e dintre li federacions dont la FELCO es afiliada.
Sindicats
https://www.felco-creo.org/category/l-occitan-e-la-vida-publica/sindicats/
L’associacion collabòra emb toi lu sindicats que vòlon ben portar la votz de l’ensenhament public dei lengas regionali e si ten a la disposicion de toi lu sindicats que bastisson de mandats sus aqueu subjècte. Es en aquel esperit qu’avem contribuit tant coma l’avem poscut, au dedintre de mantun acamp preparatòri au congrès de la FSU que si tenguet lo mes passat a Rennes, a l’escritura d’amendaments que prenon la direccion de l’aplicacion dei tèxtes que regisson lo nòstre ensenhament.
FLAREP
https://www.felco-creo.org/19-20-21-octobre-colloque-flarep-en-flandre/
Après l’acapitada dau collòqui de Niça, la FLAREP tenguèt lo sieu collòqui annadièr en Flandre e foguèt l’occasion de s’avisar que la rompedura comunicacionala ministeriala es tanben un subjècte de preocupacion de la FLAREP. A l’initiativa de la FELCO una demanda d’audiença foguèt mandada un còup de mai en data dau 6 de febrièr. Lo constat de l’absença dei sindicats au darnièr collòqui de la FLAREP foguèt tanben l’ocasion per la FELCO de remembrar en un document intèrn a la FLAREP l’importança de la relacion privilegiada que devem tratenir emb toti li organizacions sindicali.
APLV
https://www.aplv-languesmodernes.org/
Sus lo subjècte mai precís de l’ensenhament dei lengas, l’APLV juega un ròtle actiu dapé lo ministèri e lo rapresentant de la FELCO, membre dau CA de l’APLV, manca jamai de nos assabentar sus lu acamps e projèctes menats per l’APLV, en li prenent tota la sieu part e li porgent tota la sieu contribucion. A la sieu demanda, un renovelament dau rapresentant de la FELCO dintre lo CA de l’APLV deuria si faire d’aquí pauc e si podem regaudir que de collègas an manifestat un interès per assegurar aquela succession e permettre a la FELCO d’aver un dei sieu membres present dintre lo CA de l’APLV.
La FELCO es una associacion aderenta de l’APLV, mas de segur, las adesions individualas dels collègas occitanistas son una bona causa per faire créisser nòstra credibilitat.
Congrès
Es parier dintre lo Congrès (Le Congrès permanent de la langue occitane) dont un rapresentant actiu de la FELCO permete d’establir lo ligament tra li doi estructuras. Mercés en aquela presença, la FELCO a demandat a la direccion dau Congrès qu’un rapòrt d’etapa sigue comunicat sus l’òbra dau diccionari qu’es a si menar e lo reviscolament dau Conselh dei Usatgièrs dau Congrès, dont la FELCO i serà presenta en tant qu’associacion usatgièra essenciala es de bòn augura per la seguida. Pasmens, en tant que membre dau Congrès la FELCO augura a l’avenir estre consultada quora una decision politica e non pas tecnica engatja lo Congrès.
Pour que vivent nos langues
https://www.pourqueviventnoslangues.org/
Au dedintre dau collectiu Pour que vivent nos langues, la FELCO participa justament e activament a l’estructuracion dau collectiu en associacion : lu nòstres estatuts inspiran aquesta transformacion. Sus l’annada 2024, pòrti a la conoissença dei collègas qu’un estudi intèrn a PQVNL (https://www.felco-creo.org/07-10-24-pqvnl-analyse-du-fonctionnement-des-derniers-mois/) a mostrat que la FELCO es la mai presenta ai acamps dau collectiu e la mai activa en lu escambis tra lu membres dau collectiu. Per lo primièr còu despi la creacion dau collectiu en lo 2019, avem pasmens refudat au meme titre qu’esquasi toi lu partenaris occitans que son membres de PQVNL de participar coma FELCO a una jornada d’accion lo 1er de junh qu’era segon nautres abrivada un pauc a la lesta e dont eravam segurs de mancar de ressorças umani e logistiqui per portar una ajuda credibla e utila au moviment. Avèm de segur laissat cada associacion academica liura de participar o non a l’accion.
Nòva Estivada
https://www.felco-creo.org/27-28-de-julhet-2024-la-felco-e-lo-creo-lengadoc-a-lestivada-de-rodes/
Per contra, emb temps, anticipacion e volontat, foguet un grand plasir de portar peira a la Nòva Estivada de Sebazac reviscolada per un collectiu associatiu d’Avairon.
La FELCO a respondut favorablament a la demanda d’ajuda financiària e umana de la còla d’organizacion e a poscut, emb lu amics e partenaris d’OCBI, tenir un estand tres jorns durant que permetet escambis e rescòntres umans sensa equivalent coma dau temps de l’anciana Estivada e participar a de taulas redoni e de debats que fan viéure aqueu festenal en una version tota nòva. Decision foguet presa de segre l’organizacion en aquesta nòva dralha e si regaudissem de sostenir activament un eveniment vielh de mantuna decenia qu’avia da besonh de tornar s’inventar en un format diferent emb una programacion diferenta.
Per l’Estivada 2025, es aquí : https://www.felco-creo.org/21-01-25-de-novelas-de-lestivada-24-26-de-julhet-2025-campanha-de-sosten-e-dadesions/
Situacion dei collègas – Accion de la FELCO
La situacion dei collègas qu’ensenhan e que sovent militan en lo fra temps en lu sindicats, li associacions o estructuras culturali es gaire aisada. Siam estats atentius a de reformas coma darnierament aquela dau « choc des savoirs » en collègi per veire se li condicions orari e umani podian si degradar de mai. Es en aquesta dralha de l’interès de la disciplina que si siam manifestats tanben sus la reforma de la formacion dei mèstres dont asperam una confirmacion de l’existença dau CRPE especial e dont siam totjorn a l’aspera d’un retorn de l’opcion LVR au CRPE classic. Si trovam en l’encrosilhament de camins que pòdon estre tan constructius coma nefastes.
La FELCO, a l’imatge bailat per lu mieu predecessors Felip Martel e Yan Lespoux, es aquí per remembrar que degun demorerà solet en lo sieu canton, duberta a l’òbra collectiva e determinada per servir l’interès de la situacion de l’ensenhament public de l’occitan e aquela dei collègas qu’an fach una causida pas facila mas totplen onorabla.
